Táýelsizdik kúni qala ákimi Baqytjan Saǵyntaev «Shańyraq» jáne «Nurly jer» baǵdarlamalary arqyly baspanaly bolǵan jańa qonys ıelerin quttyqtady.
Almaty qalasyndaǵy kópbalaly jáne az qamtylǵan otbasylardyń 372 turǵyny endi jańa páterlerge kiredi. «Shańyraq» baǵdarlamasymen Naýryzbaı aýdanyndaǵy «Nurly dala» turǵyn úı kesheninen 232 páter berildi. Bul baǵdarlama Memleket basshysynyń tapsyrmasy boıynsha qoljetimdi nesıeler arqyly turǵyn úımen qamtamasyz etý maqsatynda ázirlengen.
«Nurly jer» turǵyn úı-kommýnaldyq damý baǵdarlamasynyń «jaldamaly turǵyn úı» baǵyty boıynsha kezekte turǵan 140 adam páter kiltterin aldy. Túrksib aýdanynyń «Jas qanat» yqshamaýdanynda 80 páter, Alataý aýdanynyń 13-shi yqshamaýdanynda 60 páter berildi.
Páter kiltterin tapsyrý rásiminde qala ákimi Baqytjan Saǵyntaev jınalǵandardyń barlyǵyn Táýelsizdik kúnimen quttyqtady, búgingi ıgi sharanyń sımvolıkaly ekenin atap ótip, jańa qonys ıelerine baqyt tiledi.
«Táýelsizdik kúninde baspanaly bolý zor qýanysh. Úılerińizde árqashan beıbitshilik, qýanysh pen tynyshtyq ornasyn! Qonys toıy qutty bolsyn!», - dedi B. Saǵyntaev.
Jyl basynan beri Almatyda páterge muqtaj 2184 otbasy baspanaǵa ıe boldy. Sonyń ishinde «Nurly jer» baǵdarlamasy boıynsha 289, «Baqytty otbasy» – 376, «Shańyraq» – 250, «Almaty Jastary 3.0» – 1000, «TÚQJB-nyń nesıelik turǵyn úı jelisimen» – 360 adam úıli boldy.