Jambyl oblysy negizinen aýyl sharýashylyǵy salasyna qolaıly aımaq bolǵandyqtan, munda asyraýshy salany alǵa bastyratyn bastamalar kóp. Olar memleket qoldaýynyń nátıjesinde jyl saıyn órken jaıyp, óristep keledi. Máselen, Moıynqum aýdanynda ornalasqan «Agrofırma Túrikpen» JShS bul kúnde asyl tuqymdy mal baǵyp, sanyn kóbeıtýmen aınalysýda.
Búginde tirligi tiktelip, sharýasy shalqyǵan seriktestik mal basyn kóbeıtip qana qoımaı, jergilikti jurtshylyqty da jumyspen qamtýda. Atalǵan sharýashylyq osydan 20 jyl buryn, ıaǵnı 2000 jyly qurylǵan eken. Násibin kásipten taýyp otyrǵan sharýashylyq basshysy Baýyrjan Ábildaev kásibin damytyp qana qoımaı, eńbek adamdaryna da tıisti jaǵdaı jasap otyr. Búginde «Agrofırma Túrikpen» sharýashylyǵynda 74 adam jumys isteıdi. Malshylardyń ortasha aılyǵy – 180 myń teńge.
Qazirgi kezde atalǵan sharýashylyqta mal sany 6 225 bas múıizdi iri-qaraǵa jetken. Sondaı-aq seriktestikte 724 bas jylqy jáne 680 bas usaq qara mal basy bar. Onyń ishinde 5 334 bas qalmaq sıyry men 930 bas qazaqtyń aqbas sıyry bar. Al 2015-2020 jyldar aralyǵynda salynǵan jalpy ınvestısııa kólemi 3 mıllıard teńgeden asqan. Onyń ishinde asyl tuqymdy mal satyp alýǵa 2,5 mıllıard teńge ınvestısııa salynǵan. Sonymen qatar tehnıka satyp alýǵa 200 mıllıon, al qorajaı, qudyq, uńǵyma jáne malshylar úıin salýǵa 400 mıllıon teńge kóleminde qarjy jumsalǵan. Aýylsharýashylyq maqsatynda 6 birlik traktor, 13 birlik tirkemeli shalǵy, jatka, press-jınaýshy, tıegish, arba jáne tyrma bar. Sondaı-aq 4 birlik KamAZ, HOWO, Huanghe aýyr júk kóligi alynǵan. Atalǵan sharýashylyqta 131 ZıL, 12 jeńil avtokólik jumys isteıdi. Jalpy, jer kólemi 12 508 0,44 gektardy quraıdy. Onyń ishinde 120 192,26 gektar jaıylym, 4 888,18 gektar egistik jer bar. Talaı jyldan beri tynymsyz eńbek etip kele jatqan seriktestik bul kúnde damyǵan, kórkeıgen sharýashylyqtardyń qatarynda.
Eńbek adamdarynyń erlikpen birdeı eseli eńbegi el basshylyǵynyń tarapynan da tıisti deńgeıde baǵalanýda. Bıyl Memleket basshysynyń Jarlyǵymen «Agrofırma Túrikpen» jaýapkershiligi shekteýli seriktestigi «Qurmet» ordenimen marapattaldy. Joǵary mártebeli syılyqty Táýelsizdik kúnine oraı Taraz qalasyndaǵy «Balasaǵun» ortalyq konsert zalynda ótken saltanatty jıynda Jambyl oblysynyń ákimi Berdibek Saparbaev atalǵan seriktestiktiń basshysy Baýyrjan Ábildaevqa arnaıy tapsyrdy. Bul qurmet te talaı jylǵy tókken terdiń, aıanbaı etken eńbektiń jemisi ekeninde daý joq.
Jambyl oblysy