Elorda ákimi Altaı Kólginov Nur-Sultan qalasynyń energetıkterimen kezdesip, olardyń jalaqysyn álde de kóterýdi tapsyrdy. Olar «Astana-AEK» AQ, «Astana-Energııa» AQ, «Astana Teplotranzıt» AQ jumysshylary, onyń ishinde «Astana Sý Arnasy» MKK mamandary. Qosymsha syıaqy da beriletin bolady.
Esterińizge sala keteıik, Altaı Kólginovtiń tapsyrmasy boıynsha 2020 jyldan bastap energetıkterdiń jalaqysy (barlyq vedomstvolyq uıymdar) artty. Qala ákimi qyzmetkerlerdi energetıkter kúnimen quttyqtap, eńbek jaǵdaılaryn júıeli túrde jaqsartý qajettigin atap ótti.
«Biziń klımat kúrt kontınentaldy, elordamyz álemdegi eń sýyq astanalardyń biri. Energetıkterdiń tynbaı etken eńbeginiń arqasynda qalaǵa jylý, jaryq, sý úzdiksiz kelip turady. Qys aılarynda energııa kózderine túsetin salmaq artady. Altynshy týrbınany qosý bizge qosymsha 120 MVt elektr energııasy men jylytý úshin 180 gıgakalorııa beredi. JEO-1 jáne JEO-2 qazandyqtary gazǵa aýystyryldy. Bul sharalar energııa kózderine salmaq túsirmeýge múmkindik beredi.
Eńbek jaǵdaıyn jasaý úshin bıyl jalaqyny josparly túrde kótere bastadyq, kelesi 2021 jyly jalǵastyramyz. Biz jumysshylarymyzdyń eńbegin baǵalaımyz! Eńbekterińiz úshin rahmet! Energetıkter kúnimen!»,- dedi Altaı Kólginov.