Halyqaralyq júzý federasııasy (FINA) 2020 jyly Tokıoda alaýy tutanatyn Olımpııa oıyndarynyń irikteý týrnırinde sý dobynan qaı komandalardyń ózara kúsh synasatynyn jarııa etti.
Qazaqstannyń áıelder quramasy V tobynda óner kórsetedi. Qarsylastarymyz – Grekııa, Majarstan jáne Izraıl. Osylardyń arasyndaǵy eń úzdigi – majarstandyqtar. Olar álem chempıonatynda eki ret top jaryp, bir kúmis jáne bir qolany oljalady. Eýropa chempıonatynda 3 altyn, 5 kúmis jáne 5 qolany ıelendi. Sońǵy úsh Olımpııa oıyndarynda tórtinshi orynǵa taban tiredi. Grekııalyqtar da álemdik jáne qurlyqtyq dodalarda jeńis tuǵyryna kóterilgen komanda. Irikteý týrnıri kelesi jyldyń 19-24 qańtary aralyǵynda Italııada ótedi. Al A tobyndaǵy básekelerde Italııa, Fransııa jáne Nıderland quramalary kúsh synasady.