Qyzylordadaǵy Ybyraı Jaqaev atyndaǵy Qazaq Kúrish sharýashylyǵy ǵylymı-zertteý ınstıtýtynda Ortalyq Azııa memleketteriniń aýmaǵyndaǵy sýarmaly alqaptardy tuzdanýdan saqtaýǵa arnalǵan konferensııa ótti, dep habarlaıdy Egemen.kz.
FAO-ǴEQ «Ortalyq Azııa men Túrkııadaǵy qurǵaqshylyqqa jáne sortańdanǵan aýylsharýashylyq óndiristerindegi tabıǵı resýrstardy keshendi basqarý» jobasy aıasyndaǵy is-sharada óńirdegi sortańdanǵan alqaptar men olardy qalpyna keltirý baǵytyndaǵy tájirıbeler jaıly aıtyldy.
Elimizdegi aýylsharýashylyq jerleriniń aýmaǵy 226,6 mln gektar bolsa, onyń 2,3 mln gektary sýarmaly alqaptar. Al oblystaǵy sýarmaly alqap kólemi 231400 gektar bolyp otyr. Bul aýmaqtyń 178 100 gektary ınjenerlik-josparlanǵan jer.
Degenmen de sońǵy jyldary keıbir sharýa qojalyqtarynda kúrish ónimdiligi josparlanǵan deńgeıden tómendegeni baıqalady. Mamandar munyń negizgi sebebi aýyspaly egis júıesiniń buzylýynan bolyp otyrǵanyn aıtady. Sonymen qatar sýarmaly jerlerdiń ekologııalyq jáne melıoratıvti jaǵdaıynyń nasharlaýy, agrotehnıkanyń saqtalmaýy da oıdaǵydaı ónim alýǵa keri áserin tıgizip otyr.
Osyǵan baılanysty FAO-nyń jobasy aıasynda Jaqaev atyndaǵy Qazaq kúrish sharýashylyǵy ǵylymı-zertteý ınstıtýty mamandary aýyspaly egistik alqaptarda qant qumaıy men jergilikti seleksıonerler shyǵarǵan túıejońyshqanyń "Alaýla" sortyn ósirý arqyly topyraqtaǵy tuz rejımin retteýdiń ınnovasııalyq tásilderin engizip otyr. Konferensııada ǵalymdar sýarmaly jerlerdiń qunarlylyǵyn arttyryp, jer resýrstaryn turaqty basqarýdyń tásilderi men quraldaryn jetildirýge baǵyttalǵan osy bastama jaıly keńinen aıtyp ótti.