Atyraý oblysyna jumys sapary barysynda Cybaılas jemqorlyqqa qarsy is-qımyl agenttiginiń tóraǵasy Alık Shpekbaev qalalyq memlekettik mekemelerdiń qaıta qurylǵan qyzmetimen tanysyp, bıznes-qoǵamdastyqpen jáne jurtshylyqpen kezdesýler ótkizdi, dep habarlaıdy Egemen.kz.
Bul kún «Azamattarǵa arnalǵan úkimet» memlekettik korporasııasy» KE AQ Atyraý oblysy boıynsha jańa fılıalyna barýdan bastaldy. Ol bir mezgilde 30 tutynýshyǵa qyzmet kórsetip, HQKO úshin qalypty emes Jer kadastry jáne jyljymaıtyn múlikti tehnıkalyq tekserý departamenti men Zeınetaqy tóleý jónindegi memlekettik ortalyq qyzmetterin kórsetedi.
Memlekettik mekemeler usynatyn qyzmettiń sapasymen tanysýdy jalǵastyra otyryp, Shpekbaev oblystyq sot janyndaǵy Quqyq qorǵaý jáne tatýlastyrý qyzmetteri ortalyǵyna jol bastady. «Azamattarǵa yńǵaıly bolý úshin biz qyzmetter aýqymyn keńeıttik. Eger buryn Ortalyq azamattarǵa tek quqyqtyq keńes berse, qazir ótinish bildirýshiler bilikti zańgerlik, psıhologııalyq jáne medıatıvtik kómek alady», – dep atap ótti oblystyq sot tóraǵasy B. Jumaǵulov.
Odan keıin Agenttik tóraǵasy Atyraý qalasy servıstik ákimdiginiń qyzmetimen tanysty. Birinshi qabat yńǵaıly qyzmet kórsetý úshin tolyǵymen qaıta jasaqtalǵan. Sondaı-aq, jedel ózara árekettesý úshin qyzmetkerler, sonyń ishinde menedjerler open space jumys nysanyna kóshti.
Servıstik ákimdik ǵımaratynda Shpekbaev turǵyn úı, jer alý jáne turǵyn úılerge jóndeý jumystaryn júrgizý máseleleri boıynsha azamattardy jeke qabyldady.
Sondaı-aq, vedomstvo basshysy H.Dosmuhamedov atyndaǵy Atyraý ýnıversıtetine taban tirep, «Sanaly urpaq» jemqorlyqqa qarsy jobasynyń qyzmetimen tanysty jáne ZOOM arqyly stýdenttermen kezdesti.
Sybaılas jemqorlyqqa qarsy vedomstvo basshysy A.Shpekbaevtyń bıznes-qaýymdastyqpen kezdesýi jumys saparynyń ózegine aınalyp, onyń barysynda kásipkerlerdi tolǵandyratyn máseleler talqylandy.
Áńgime barysynda Agenttik tóraǵasy memlekettiń ekonomıkadaǵy retteýshi rólin tómendetý jáne kásipkerlik qyzmetke zańsyz aralasýǵa jol bermeý qajettigin taǵy da atap ótti.