Elimizde maral sharýashylyǵynyń irgesi keńeıip keledi. Al buǵy baqqan sharýalardyń deni Shyǵys Qazaqstan oblysynda tursa, endi bul tizimge Jetisý da qosyldy. Jaqynda Aqsý aýdanynyń Sýyqsaı aýylynda maral fermasy ashyldy, dep habarlaıdy Egemen.kz.
Maral ósirý medısınalyq týrızmdi damytýǵa jol ashady eken. Qazir bul kásipti turaqty tabys kózine aınaldyrǵan shyǵystyq maral ósirýshilerdiń aýylyna shetelden arnaıy keletin adamdar qatary kóbeıipti.
Ásirese, maral múıizin kesetin maýsymda dertine daýa izdegen týrıst legi úzilmeıdi. О́ıtkeni, maral múıizinen aqqan qannyń quramynda 25 túrli mıkroelement bar kórinedi, onyń adam aǵzasyna tıgizetin oń áseri óte joǵary ekeni de medısınada dáleldengen. Múıizdi býyna túsip, sorpalaný kisi boıyndaǵy súıek, býyn aýrýlarynyń myńda bir shıpasy eken. Demek, maral sharýashylyǵyn damytýǵa degen suranystyń artatyn jóni bar.
Osy maqsat aqsýlyq kásipkerdi maral sharýashylyǵyn ashýǵa ıtermelepti. Endi «Arshaly týr» seriktestiginiń aýmaǵynda maral tabyny órip júretin bolady. Sýyqsaı aýylyna Shyǵys Qazaqstan oblysynan 23 bas maral jetkizildi. Buryn-sońdy Jetisý topyraǵyna aıaq baspaǵan janýarlar qazir beıimdelýden ótip, jaıylymǵa shyǵarylǵan.
«Buǵy baǵý qazaqqa tańsyq kásip bolmasa da, buryn istep kórmegen adamǵa qıyn tıeri anyq. Osy kásippen aınalysýǵa bel býǵan soń bıyl jazda Katonqaraǵaıǵa arnaıy baryp, maral sharýashylyǵynyń qyr-syryna qanyqtyq. Ol jaqtaǵy jigitterden 10 kún boıy sabaq alyp, tájirıbe jınap qaıttyq. Panta ázirleýdi de úırendik. Endi Jetisýda da maral sanyn kóbeıtip, panmen emdeıtin ortalyq ashýǵa nıettimiz», deıdi «Arshaly týr» seriktestiginń basshysy Berik Aldabergenov.