Elimizde Elbasy Nursultan Nazarbaevtyń bastamasymen qolǵa alynǵan «El úmiti» baǵdarlamasy aıasynda halyqaralyq pán olımpıadalarynyń júldegerlerine beriletin El maqtanyshy syılyǵy, «Myń bala» ulttyq olımpıadasy jáne jeti negizgi baǵyt boıynsha talantty jastardyń áleýetin damytý úshin «Elbasy medali» taǵaıyndalǵany belgili.
Pavlodar oblystyq bilim basqarmasynyń uıymdastyrýymen ótken saltanatty is-sharaǵa «Myń bala» ulttyq olımpıadasynyń jeńimpazdary, respýblıkalyq fızıka-matematıka mektebiniń oqýshysy Jubanysh Amanbek, oblys ortalyǵyndaǵy №38 mekteptiń oqýshysy Mustafa Tileýbekuly, Kenjekól orta mektebiniń 6-synyp oqýshylary Nurasyl Shákar, Altynaı Qabıbolla, Aıhana Qalıeva qatysty.
Oblys ortalyǵyndaǵy Nazarbaev zııatkerlik mektebiniń oqýshysy Haıdar Qaıyrbek 500 myń teńge syıaqy kóleminde
El maqtanyshy syılyǵyn aldy. Haıdar bıyl 52-shi Halyqaralyq olımpıadada qola júlde alsa, ustazy Orazbaı Asylbek te marapatqa ıe boldy. Osy oqýshylar sııaqty «El úmitin» jeńip alǵan óńirimizdiń 53 jas órenine Nursultan Nazarbaev qorynan noýtbýkter tabys etildi. Al oblys ortalyǵyndaǵy №17 mekteptiń oqýshysy Evelına Rýdko, №24 mektebiniń oqýshysy Allanur Ysqaqov, «Bilim-Innovasııa» lıseı-ınternatynyń oqýshysy Arnur Dáýlet sııaqty 14 oqýshy «Elbasy medalimen» marapattaldy.
Jas daryndardy quttyqtaǵan óńir basshysy Ábilqaıyr Sqaqov Elbasy jas talanttardy árdaıym qoldaıtynyn jáne elimizde olardyń odan ári damýy úshin jaǵdaı jasalyp jatqanyn atap ótti.
Oblys ákimdiginde ótken marapattaý rásimine 9 oqýshy qatysty, qalǵan 64 oqýshy kezdesýge ózderiniń turǵylyqty jerleri boıynsha óńirdiń qalalary men aýdandary ákimdikterinen onlaın baılanys arqyly qosyldy.
Pavlodar oblysy