Túrkistan oblysynda polıseıler jol apatynan keıin oqıǵa ornynan qashyp ketken júrgizýshini ustady, dep habarlaıdy Egemen.kz. Bul týraly oblystyq polısııa departamentiniń baspasóz qyzmeti habaraldy.
Saıram aýdandyq polısııa bóliminiń kezekshisine túngi ýaqytta Almaty-Tashkent-Termez tas jolynyń 667 shaqyrymynda jol-kólik oqıǵasy bolǵany týraly habarlama kelip túsedi. Oqıǵa ornyna shuǵyl jetken polısııa qyzmetkerleri belgisiz kóliktiń júrgizýshisi joldy kesip ótpek bolǵan turǵyndy qaǵyp, sońynan qashyp ketkenin anyqtaǵan. Apat saldarynan jaıaý júrginshi oqıǵa ornynda kóz jumdy.
Atalǵan jaıt Saıram aýdandyq polısııa basqarmasynda QR QK-niń 345-baby (kólik quraldaryn júrgizýshi adamdardyń jol qozǵalysy nemese kólik quraldaryn paıdalaný erejelerin buzýy) jáne 347-baby (jol-kólik oqıǵasy bolǵan jerden ketip qalý) boıynsha tirkeldi.
Jol-kólik oqıǵasyna qatysy bar júrgizýshini ustaý maqsatynda Saıram aýdandyq polısııa basqarmasy qyzmetkerlerimen jedel-izdestirý jumysy júrgizildi.
Oqıǵa ornynan belgisiz júk kóliginiń synyq qaldyqtary alyndy. Júrgizilgen is-sharalar nátıjesinde tártip saqshylary kináli júrgizýshini qolǵa túsirdi. Ol qamaýǵa alyndy. Tekserý barysynda anyqtalǵandaı Tashkent baǵytyna qaraı ketip bara jatqan «Mersedes-Bens» markaly júk kóliginiń júrgizýshisi belgilenbegen jerden kesip ótpek bolǵan Almaty qalasynyń turǵynyn qaǵyp ketken.
Qazirgi ýaqytta oqıǵa boıynsha sotqa deıingi tergeý amaldary júrgizilýde. Saraptama taǵaıyndaldy. Tártip saqshylary bolǵan oqıǵanyń barlyq mán-jaılaryn anyqtaýda.