Birinshi orta salmaqta kúsh synasyp júrgen qazaqstandyq kásipqoı boksshy Sadrıddın Ahmedov 30 qańtarda Meksıkanyń Kýernavaka qalasynda ótetin boks keshinde óner kórsetedi, - dep habarlaıdy Egemen.kz
Jerlesimiz nıderlandtyq Stıven Danomen judyryqtasady. 31 jastaǵy Qyzǵaldaqtar eliniń ókili osy kúnge deıin 23 márte rıngke kóterilip, 17 ret jeńis toıyn toılady. Alty qarsylasyn ol nokaýtpen utty. Úsh kezdesýde utylyp, taǵy úsh básekede teń esep tirkeldi. Osydan úsh jyl buryn Anglııanyń Saýtgempton qalasynda uıymdastyrylǵan jarysta Dano qazaqstandyq Aleksandr Jýravskıımen kezdesip, upaı sanymen basym túsken edi.
Al 22 jastaǵy Sadrıddın Ahmedovtyń WBC nusqasy boıynsha jastar arasyndaǵy álem chempıony degen ataǵy bar. Kásipqoılar arasynda 11 jekpe-jek ótkizgen ol barlyǵynda jeńiske jetip, 10 qarsylasyn esinen tandyrdy. Bul básekede WBA Continental tujyrymynyń altyn belbeýi sarapqa salynady.