Premer-Mınıstr Asqar Mamınniń tóraǵalyǵymen ótken Úkimet otyrysynda Úkimettiń zań jobalaý jumystarynyń 2020 jylǵa arnalǵan jospary týraly Ádilet mınıstri Marat Beketaev baıandady, dep habarlaıdy Egemen.kz.
Ádilet mınıstriniń aıtýynsha, Úkimettiń zań jobalaý jumystarynyń 2020 jylǵa arnalǵan jospary bekitilgende 17 zań jobasyn ázirleýdi jáne Parlamentke engizýdi kózdedi. Jyl ishinde engizilgen túzetýlerdi eskere otyryp, Jospar 22 zań jobasyn ázirleýdi jáne Parlamentke engizýdi kózdeıdi. Marat Beketaev túzetýlermen 7 zań jobasy engizilgenin naqtylady, 2 zań jobasy alyp tastaldy, 2 zań jobasy boıynsha engizý merzimderi aýystyryldy.
«Memlekettik organdardyń zań jobalaryn engizý merzimderin aýystyrýy Premer-Mınıstri Keńsesi jáne Prezıdent Ákimshiligi basshylyǵymen kelisildi. Ázirleýshi organdar Úkimettiń zań jobalaý jumystary Josparynyń ýaqytyly oryndalýy boıynsha, sondaı-aq zań jobalaý qyzmetin tıimdi josparlaý boıynsha barlyq qajetti sharalardy qabyldaǵanyn atap ótken jón», — dedi ol.
Búgingi tańda Úkimettiń zań jobalaý jumystarynyń 2020 jylǵa arnalǵan jospary tolyq kólemde oryndaldy, 22 zań jobasynyń barlyǵy Parlamentke ýaqytyly engizildi. Odan soń mınıstr Úkimettiń zań jobalaý jumystarynyń 2021 jylǵa arnalǵan jospar jobasy týraly baıandady.
«Ádilet mınıstrligi Zań jobalaý qyzmeti máseleleri jónindegi vedomstvoaralyq komıssııanyń múshelerimen birlesip, memlekettik organdardyń usynystary boıynsha Úkimettiń zań jobalaý jumystarynyń 2021 jylǵa arnalǵan jospar jobasyn daıyndady. Jospar jobasy Memleket basshysy jáne strategııalyq qujattarda aıqyndalǵan tapsyrmalar negizinde qalyptastyryldy, onda 25 zań jobasyn ázirleý kózdelgen», — dedi mınıstr.
Ol sonymen qatar ázirlenýge usynylǵan zań jobalardyń ishinen 2021 jyldyń birinshi jartyjyldyǵynda Parlamentke 13 zań jobasyn, al ekinshi jartyjyldyǵynda 12 zań jobasyn engizý josparlanyp otyrǵanyn jetkizdi.
Aldaǵy jyly «Qoǵamdyq baqylaý týraly», «Qazaqstan Respýblıkasynyń bıologııalyq qaýipsizdigi týraly», «Geodezııa, kartografııa jáne keńistiktik derekter týraly» jáne «Áskerı polısııa organdary týraly» jańa zań jobalarynyń ázirlenýi kózdelýde.
Jalpy, ádilet mınıstri óz sózinde atap ótkendeı, zań jobalaý jumystarynyń josparynda kózdelgen zań jobalary Memleket basshysy qoıǵan birinshi kezektegi zańnamalyq mindetterdi sheshýdi kózdeıdi. Onyń ishinde halyqtyń áleýmettik jáne ekonomıkalyq máselelerin sheshýge, sondaı-aq jekelegen salalardaǵy zańnamany odan ári jetildirýge baǵyttalǵan.