Qorǵanys vedomstvosynyń basshysy Nurlan Ermekbaev elimizdiń Qarýly Kúshterinde áskerı qyzmetshilerge bilim berý jáne kásibı damytý máselelerine birinshi kezekte nazar aýdarylǵanyn atap ótti, dep habarlaıdy Egemen.kz.
«О́tken oqý jylynda Qarýly Kúshterde 60 myńnan astam maman ázirlendi. Budan ózge, 200-den astam oqý-jattyǵý, áskerı kólik pen avtokólik tehnıkalaryn júrgizý jóninde 16 myń sabaq ótkizildi, 20 myń jaýyngerlik atys ótti. Sabaqtar kúndizgi jáne túngi mezgilde ótkizildi. Jaýyngerlik daıarlyqqa eń qajetti komponentter, atap aıtqanda, ozyq tehnologııalar men quraldar engiziledi. Áskerler zamanaýı qarý-jaraqpen jaraqtanýda», dedi N. Ermekbaev.
Onyń aıtýynsha, áskerı oqý oryndary robot tehnıkasy men radıoelektrondyq kúreske basymdyq bere otyryp, ǵylymı zertteýler júrgizýde.
«Áskerı mamandar drondarǵa qarsy qarýdy, ushqyshsyz ushý apparattaryn ázirledi. Ǵylymı vzvodtar qujattardy berýdiń avtomattandyrylǵan júıesin ázirledi. Bul memlekettik qyzmet kórsetý kezinde bıýrokratııalyq rásimderdi qysqartady», dedi ol.
Sondaı-aq ol áleýmettik saıasattyń jańa paradıgmasy aıasynda áskerı qyzmetshilerdiń turǵyn úı-turmystyq jaǵdaılaryn jaqsartý jónindegi jumystar jalǵasyn taýyp jatqanyn aıtty.
«2018 jyldan bastap jeńildetilgen ıpotekalyq nesıe arqyly 4 myńnan astam áskerı qyzmetshi turǵyn úı baǵdarlamalary boıynsha («7-20-25», «Baspana Hıt», «Áskerı Baspana» jáne basqalary) turǵyn úı satyp aldy. 2020 jyly 600-den astam nysanǵa aǵymdaǵy jóndeý júrgizildi. Bul ótken jyldyń kórsetkishinen bir jarym ese kóp. 30 ǵımarat kúrdeli jóndeýden ótti. Kazarmalyq-turǵyn úı qorynyń jańa obektileri, onyń ishinde jeńil modýldik qurylystar, kazarmalar, ashanalar, qoımalar, oqý jáne sport keshenderi salynýda. Bıyl osyndaı 56 ǵımarat salyndy», dedi mınıstr.
Budan bólek 2020 jyly úısiz jumystan shyqqan áskerı zeınetkerlerdi turǵyn úımen qamtamasyz etý boıynsha sharalar qabyldanǵan. 20 jyldan astam eńbek ótili bar 87 áskerı zeınetker turǵyn úıdi óteýsiz jekeshelendirý quqyǵynyń ornyna aqshalaı ótemaqy alǵan. Jabyq qalashyqtarda turatyn 20 jyldan kem eńbek sińirgen 262 burynǵy áskerı qyzmetshi turǵyn úıdi aıyrbastaý quqyǵyn paıdalandy.
Bıyl áskerı qyzmetshilerdi áleýmettik qamtamasyz etýge Qorǵanys mınıstrliginiń jyldyq bıýdjetinen 67 paıyz qarajat jumsaldy. Qorǵanys vedomstvosynyń barlyq qyzmeti bıýdjet tártibin múltiksiz saqtaýmen iske asyrylady.
Qarajatty tıimdi jumsaý aıasynda kórsetkishterdi taldaýǵa, problemalar men tolyq emes esepter kórsetilgen taldaý júrgizý arqyly bıýdjettik baǵdarlamaǵa aı saıyn monıtorıng júrgizedi. Mınıstrlik qarjylandyrýdyń balama kózderin izdeıdi, Qarýly Kúshterdiń qurylymyn ońtaılandyrý arqyly únemdeýge qol jetkizedi. Memlekettik-jekemenshik áriptestik tetigi pysyqtalýda. Bıyl 9,3 mıllıard teńge únemdeldi. Bul ótken jylmen salystyrǵanda úsh ese joǵary (2019 jyly 3,1 mlrd. teńge).
Qazaqstan halqyna jyl saıynǵy Joldaýynda Prezıdent sıfrlandyrýdy barlyq reformalardyń bazalyq elementi dep atady
Qorǵanys mınıstrliginde «Sandyq armııa» baǵdarlamasy aıasynda halyqqa qyzmet kórsetetin 13 memlekettik qyzmet elektrondy formatqa aýystyryldy. Endi túri anyqtamalar, tirkeý kýálikteri men áskerı bıletter, áskerı esepke qoıý men shyǵarý, áskerı-tehnıkalyq mektepterge túsý elektrondyq úkimet portaly arqyly resimdeýge jáne alýǵa bolady.
Avtomattandyrylǵan basqarý júıesiniń qoldaný aıasy keńeıtildi. Ol elektrondy jumys prosesin, áskerlerdiń qyzmetine qajetti aqparatty sandyq esepke alýdy qamtıdy. Sonymen qatar, áýe keńistigin baqylaý avtomattandyrylǵan rejımge aýystyryldy.
Jalpy alǵanda Qarýly Kúshterde ártúrli maqsattaǵy 16 aqparattyq júıe engizildi. Olardyń 11-i ónerkásiptik paıdalanýǵa qabyldandy. Aqparattyq júıeler ártúrli resýrstardy esepke alýdy jeńildetedi.
Sıfrlandyrý jaýyngerlik mindetti alýdan bastap, onyń oryndalýyn taldaýǵa deıingi basqarýshylyq qyzmet aınalymyn qysqartýǵa múmkindik beredi.