Pákistan astanasynda kórnekti ǵalym men oıshyldyń 1150 jyldyǵyna arnalǵan «ál-Farabıdiń jahandyq forýmy» halyqaralyq ǵylymı-praktıkalyq konferensııasy ótti, dep habarlaıdy Egemen.kz.
Is-sharany Islam Yntymaqtastyq Uıymynyń ǵylym jáne tehnologııalar salasyndaǵy yntymaqtastyq máseleleri jónindegi turaqty komıssııasy (KOMSTEK) Pákistan Prezıdenti Arıf Alvıdiń tikeleı qoldaýymen jáne qatysýymen ótkizdi.
Forým bıyl IýNESKO aıasynda Qazaqstanda jáne shetelde keńinen atalyp ótken ál-Farabıdiń mereıtoıynyń aıaqtaýshy is-sharalarynyń biri boldy.
Atalmysh sharaǵa 17 memleketten 150-den astam adam qatysty, olardyń ishinde Pákistan, AQSh, Ulybrıtanııa, Germanııa, Katar, Qazaqstan jáne basqa da elderdiń jetekshi ýnıversıtetteriniń kórnekti farabıtanýshy ǵalymdary, túrli halyqaralyq uıymdardyń, sonyń ishinde Halyqaralyq Túrki akademııasynyń, sondaı-aq elde akkredıttelgen dıplomatııalyq korpýstyń ókilderi bar.
Qazaqstan atynan IYU janyndaǵy QR Turaqty ókili Berik Aryn, QR Pákistandaǵy Elshisi Aqan Rahmetýllın jáne Qazaq ulttyq ýnıversıteti janyndaǵy ál-Farabı ortalyǵynyń jetekshisi Bekjan Meıirbaev qatysty.
Jahandyq Forýmnyń ashylý saltanatynda sóz sóılegen Pákistan Prezıdenti Arıf Alvı ál-Farabı iliminiń jalpy adamzat úshin, atap aıtqanda Islam álemi úshin myzǵymas ózektiligin erekshe atap ótti. Osyǵan baılanysty ol sońǵysyn ál-Farabıdiń zııatkerlik murasynyń adamgershilik quramdas bóligine súıene otyryp, ǵylym men tehnologııa salasynda ózine qajetti serpilis jasaý úshin kúsh-jigerin jumyldyrýǵa shaqyrdy.
IYU Bas hatshysynyń ǵylym jáne tehnologııalar jónindegi orynbasary Asqar Mýsınov qatysýshylardy ál-Farabıdiń ǵylymı murasyn IYU elderinde ǵana emes, jahandyq deńgeıde keńinen taratý jónindegi halyqaralyq is-sharalardy turaqty ótkizý týraly usynyspen múshe memleketterdiń Syrtqy ister mınıstrleri biraýyzdan qabyldaǵan arnaıy qarar týraly habardar etti.
Qazaqstannyń IYU janyndaǵy Turaqty ókili, Saýd Arabııasyndaǵy Elshisi B.Aryn bıylǵy jyly Qazaqstanda jáne shetelde ál-Farabı murasyna arnalǵan aýqymdy ǵylymı-praktıkalyq is-sharalar týraly aıtyp, onyń HHI ǵasyrdyń ózekti gýmanıtarlyq habarlandyrýyna sáıkes búkil adamzattyń ıgiligi bolyp tabylatynyn atap ketti.
Eki kúndik forým barysynda qatysýshylar ál-Farabıdiń dúnıetanymynyń negizgi erekshelikterin, onyń fılosofııaǵa, lıngvıstıkaǵa, metafızıkaǵa, psıhologııaǵa arnalǵan eńbekteriniń negizgi erejelerin, olardyń Islam álemi men batys elderi ǵalymdarynyń Orta ǵasyrlar men jańa dáýirdegi kózqarastarynyń qalyptasýyna yqpalyn, sondaı-aq uly oıshyldyń adamzat órkenıetiniń damýyna ólsheýsiz úlesin jan-jaqty talqylady.