Taraptardyń bastamasy boıynsha Sybaılas jemqorlyqqa qarsy is-qımyl agenttigi men Saýda jáne ıntegrasııa mınıstrligi basshylyǵynyń kezdesýi ótti. Negizgi kún tártibi Mınıstrlik jetekshilik etetin salalarda sybaılas jemqorlyqtyń aldyn alý baǵyty jónindegi ózara is-qımyl máselelerine baǵyttalǵan.
Beıne-konferensııa baılanysy boıynsha is-sharaǵa Sybaılas jemqorlyqqa qarsy qyzmettiń aýmaqtyq bólimsheleri, Mınıstrlik, onyń vedomstvolary men vedomstvoǵa baǵynysty uıymdary da qatysty.
Agenttik Tóraǵasynyń orynbasary Dmıtrıı Malahov Mınıstrlik qurylǵan sátten bastap (2019 jylǵy shilde aıy) birde-bir sybaılas jemqorlyq quqyq buzýshylyq anyqtalmaǵanyn atap ótti. «Sonymen birge bosańsýdyń qajeti joq. Mınıstrlik jetekshilik etetin salalardaǵy jemqorlyq táýekelderi joǵary jasyryn sıpatqa ıe. Osyǵan oraı, turaqty oń kórsetkishti qamtamasyz etý úshin birqatar aldyn alý sharalaryn iske asyrý qajet», - dedi spıker.
Atap aıtqanda, sybaılas jemqorlyq táýekelderiniń arasynda tarıftik kvotalardy, kvotaishilik mólsherlemelerdi retteý, tarıftik jeńildikter berý, áleýmettik mańyzy bar azyq-túlik ónimderine bólshek saýda baǵalarynyń shekti mánderin belgileý máseleleri bar. Tutynýshylardyń quqyqtaryn qorǵaý, sondaı-aq tehnıkalyq retteý jáne metrologııa jónindegi zańnamanyń saqtalýyn memlekettik baqylaý fýnksııasyn júzege asyrý kezinde azamattar, kásipkerler jáne vedomstvo qyzmetkerleri arasynda «tikeleı baılanys» saqtalady.
Mınıstrliktiń jaýapty hatshysy Jánibek Nópirov bıznes-úderisterdi avtomattandyrý men ońtaılandyrýǵa nazar aýdara otyryp, sybaılas jemqorlyqqa qarsy is-qımyl boıynsha qabyldanyp jatqan sharalar týraly habardar etti.
Atap aıtqanda, barlyq kórsetiletin memlekettik qyzmetter elektrondyq formatqa aýystyryldy. Tutynýshylardyń quqyqtaryn qorǵaý komıteti shaǵym berýdi jeńildetý maqsatynda, Telegram messendjerinde chat-bot jáne top qurdy. Bıyl shilde aıynan bastap sáıkestikti baǵalaý salasyndaǵy elektrondyq akkredıtteý júıesi iske qosyldy.
Qazirgi ýaqytta birqatar jobalar iske asyrylýda. «Eksporttaýshylarǵa arnalǵan biryńǵaı sıfrlyq tereze – export.gov.kz» paıdalanýǵa yńǵaıly dıdjıtal-platformany qurýǵa jáne eksportty ilgeriletý salasynda memlekettik qoldaý sharalaryn kórsetý boıynsha bıznes-prosesterdiń reınjınırıngin júrgizýge múmkindik beredi.
Taǵy bir joba – «Tutynýshylardyń quqyqtaryn qorǵaý jónindegi sıfrlyq platforma». Ol tutynýshylardyń ótinishterin ortalyqtandyryp jınaýdy, óńdeýdi jáne basqarýdy qamtamasyz etedi.
Bolashaqta Ulttyq akkredıtteý ortalyǵy «e-akkredıtteýge» kóshýdi josparlap otyr. Bul ótinim berý, sharttar jasasý, sáıkestik sertıfıkattaryn beretin kásiporyndarǵa akkredıtteý attestatyn berýdiń sıfrlyq qoltańba paıdalana otyryp, tek elektrondyq túrde júrgiziletinin bildiredi.
Mınıstrliktiń qosalqy qyzmetter men vedomstvoǵa baǵynysty organdardy ortalyqtandyrýdy kózdep otyrǵandyǵy habarlanady.