Shámshi Qaldaıaqovtyń eskertkishi ashyldy

Shámshi álemin keńinen nasıhattaý maqsatynda Almaty qalasynan arnaıy Túrkistan óńirine kelgen zııaly qaýym aldymen Arys qalasyna aıaldady. Quramynda mádenıet jáne óner qaıratkerleri, tanymal jýrnalıster, Shámshiniń zamandastary men týystary bar rýhanı kerýendi Arys qalasynyń ákimi Murat Qadyrbek kútip alyp, Shámshi ánge qosqan Arys jaǵasyndaǵy ajarly qala­nyń búgingi kelbetimen ta­nys­­tyrdy. Odan keıin Kópen Ámir­bek, Tileýberdi Bınash, Áselhan Qalybekova, Qazybek Isa, Qurmanbek Ońalbek, Álibek Shegebaı syndy óner maı­talmandary bastaǵan delegasııa Shámshiniń týǵan aýylynda boldy. Qonaqtar aldymen Sh.Qaldaıaqov aýylyndaǵy kompozıtor eskertkishine gúl shoqtaryn qoıyp, «Otyrar» h­alyq teatry ártisteriniń oryn­daýyndaǵy «Shámshi» qoıy­lymyn tamashalady. Kom­po­zıtordyń mereıtoıyna oraı ashyl­ǵan Sh.Qaldaıaqovtyń mý­zeıinde bolǵan qonaqtar Shámshi jaı­ly estelikteri men áserli áńgimelerimen bólisti.

Sondaı-aq Arystan bab kesenesine zııarat jasaǵan delegasııa ókilderi Túrkistanda Sh.Qaldaıaqov eskertkishiniń ashylýyna qatysty. Túrkistan qalasyndaǵy «Aqjaıyq» mý­zy­ka mektebiniń aldynda orna­tylǵan eskertkishtiń ashylý salta­natynda oblys ákimi О́mir­zaq Shókeev Túrkistan oblysy qazaq dalasyna qanshama daryndy syılaǵan kıeli meken ekenin atap ótti. «Ánimen keń dalany terbetip, Qazaq valsiniń ko­roli atanǵan, Qazaqstan Res­pýblıkasy Ánuranynyń avtory Shámshi Qaldaıaqovtyń bıyl týǵanyna 90 jyl tolyp otyr. Otyrarda týyp, án padıshahy atanǵan, qaıtalanbas daryn ıesiniń esimin ulyqtaý – bizge artylǵan abyroıly mindet. Túrkistan qalasynyń jańa or­talyǵynda boı kótergen kom­pozıtordyń eskertkishi – oblys jurtshylyǵyna, qazaq eline mereke qarsańynda tamasha tartý bolyp otyr»,  dedi oblys ákimi.

Qoladan quıylǵan eskert­kish­tiń bıiktigi – 2,5, uzyndyǵy – 3,5 metr. Avtory – Qazaqstannyń Eńbek sińirgen óner qaıratkeri, músinshi Tileýberdi Bınash. Eskertkish demeýshiler esebinen jasalǵan. Shyǵarmashylyq oı ústinde otyrǵan kompozıtor beı­nesiniń jas jetkinshekterdi óner­ge, mádenıetke baýlıtyn «Aqjaıyq» mýzyka mektebiniń aýlasynda boı kóterýi – zańdy­lyq. Qazaq rýhanııatynyń jan­da­nýyna ólsheýsiz úles qo­syp, búkil qazaq jerin terbet­ken Shámshi beınesi jas óner­paz­dardy izgilikke, ónerge, rýhanı baılyqqa baǵyttary anyq.

Túrkistan oblysy