Jeltoqsannyń 6-sy kúni keshke Búkilálemdik boks serııasyna qatysyp jatqan Astana Arlans ujymy Meksıkanyń Mexico Guerreros komandasyn qabyldap, 4:1 etip jeńip shyqty. Bul týraly Egemen.kz tilshisi habarlady.
Kezdesýdi 49 kıloǵa deıingi boksshylar bastady. Onda bizdiń Mardan Berikbaev meksıkalyq Hose Alberot Zaleta Reıesti utty. Budan keıin 56 kılodaǵy Meıirbolat Toıytov qarsylasy Serhıo Chırıno Sanchesten basym tústi. Al 64 kıloǵa deıingi Jánibek Ájibaı men Krıstıan Bıelma arasyndaǵy urysta qonaqtyń desi basym shyqty.
Qazaqstandyqtar sapyndaǵy bul kúngi jeńilis osymen bitti. Budan keıingi eki jigitimiz de qarsylasyn tehnıkalyq nokaýtpen jeńdi. Ekeýi de buǵan tórtinshi raýndta qol jetkizdi. Aldymen 75 kıloǵa deıingi ýkraın legıoneri Sergeı Derevıanchenko mehıkolyq Dıego de Hesýs Moreno Amadordy iske alǵysyz etip tastasa, eń sońynan 91 kılodaǵy Vasılıı Levıt vızavıi Krıstıan Demaıdy merziminen buryn súrindirdi.
Osylaısha «astanalyq arlandar» alǵashqy úsh kezdesýin de jeńispen aıaqtap otyr.
Rýslan Igilik.
Derekkóz: Egemen.kz.