Táýelsizdik kúnine oraı Túrkistan oblysynyń birqatar turǵyny baspanaly bolyp, qýanyshqa keneldi. Saıram aýdany ákimdigi tarapynan muqtaj retinde birinshi kezekte turǵan 10 otbasyna baspana kilti tabystaldy.
«Nurly jer» memlekettik baǵdarlamasy aıasynda Saıram aýdanyndaǵy kóp balaly otbasylardy turǵyn úımen qamtamasyz etý úshin respýblıkalyq bıýdjet esebinen 252 mln teńge qarjy bólingen. Bul qarajatqa 30 baspana alý josparlanǵan. Qazirgi tańda sanıtarlyq-epıdemııalyq jáne tehnıkalyq talaptarǵa sáıkes keletin 26 turǵynjaı satyp alyndy. Taǵy 4 úıdiń talapqa sáıkestigi anyqtalýda. Aýdan ákimi Ulasbek Sádibekov josparǵa sáıkes 30 baspana aýdandaǵy memlekettik turǵyn úı qorynan baspanaǵa muqtaj retinde tirkelgen kóp balaly otbasylarǵa beriletinin aıtady. Búginde aýdan aýmaǵynda baspanaǵa muqtaj retinde 370 kóp balaly otbasy tirkelgen.
Al Tólebı aýdanynda 46 otbasy baspanaly boldy. Olardyń ishinde 21 otbasy – áleýmettik jaǵynan osal top, 6 – ata-anasynyń qamqorlyǵynsyz qalǵan balalar, 9 – kóp balaly otbasy jáne 11 – memlekettik qyzmetkerler. Búginde Tólebı aýdany boıynsha barlyǵy 3 879 azamat turǵyn úı kezeginde tur. Onyń ishinde: ata-anasynyń qamqorlyǵynsyz qalǵan balalar sanatynda – 293, halyqtyń áleýmettik jaǵynan osal toptary sanatynda – 1770, kóp balaly otbasylar – 385, memlekettik, áskerı jáne bıýdjettik mekeme qyzmetkerleri sanatynda 1431 azamat tirkelgen. Kelesi jyly aýdanda 20 páterlik 9 kóp qabatty turǵyn úıdi paıdalanýǵa berip, 180 otbasyn turǵyn úımen qamtý josparlanýda. Táýelsizdik kúni Ordabasy aýdany Qaraqum aýylynyń turǵyndary úshin de umytylmas qýanysh syılady. Jańa sport kesheni paıdalanýǵa berildi. Jalpy, Ordabasy aýdanynyń sport salasynda aıtýly jumystar atqarylyp keledi. Bıyl jergilikti bıýdjet esebinen Uıalyjar men Temirlan aýylynan ashyq alańsha men strıt vorkaýt ashylǵan bolatyn. Aýdan ortalyǵyndaǵy saıabaq ta osyndaı nysanmen tolyqty. Kóp qabatty úılerdiń aýlasynda 2 ashyq alańsha, «Báıterek» mektebiniń sport zaly men alańshasy salyndy.