Jezqazǵannyń tarıhı-arheologııalyq mýzeıinde pýblısıst, aqyn, jazýshy Baýbek Bulqyshev paıdalanǵan et tabaq (astaý) saqtaýly tur. «Bul jádiger kórkemdik turǵyda sheber jasalmasa da, onyń tarıhı qundylyǵy, tárbıelik máni óte zor», deıdi atalǵan mýzeıdiń dırektory Raýshan Qaparova.
Aǵashtan oıyp jasalǵan bul ydys tarıhı tulǵanyń jaqyn týysy Ánes Saǵymbaevtyń qolynda 1981 jylǵa deıin bolypty. Al osy jyldyń qarasha aıynda ol kisi jaqsydan qalǵan jádigerdi óz qolymen ákelip murajaıǵa tapsyrdy.
Baýbek Bulqyshev – Ulytaý óńiriniń ulany. Almaty saýda-qarjy tehnıkýmynda oqı júrip, shyǵarmashylyqpen aınalysqan. О́leńderi baspasóz betterinde jıi jarııalanyp turdy. «Balalyq shaq» poemasy, «Aýyldan Almatyǵa» atty áńgimesi jaryqqa shyqty. «Lenınshil jas» (qazirgi «Jas Alash»), «Qazaqstan pıoneri» (qazirgi «Ulan») gazetterinde eńbek etken.
Uly Otan soǵysyndaǵy qandy shaıqastarǵa alǵashqy kúnderden bastap qatysyp, erliktiń jarqyn úlgisin kórsetti. Jalyndy kósemsóz sheberi, erjúrek jaýynger Máskeýdi qorǵaý, Ýkraınany azat etý shaıqastarynyń bel ortasynda bolǵan. Soǵys kezinde jazǵan shyǵarmalarynyń basym kópshiligi «Komsomolskaıa pravda» gazetinde jarııalanyp turdy. Esil er 1944 jyldyń bas kezinde qaza tapqan.
Uly Otan soǵysynda batyrlyǵymen ǵana emes, jalyndy pýblısıst retinde kózge túsken Baýbek Bulqyshevtiń «О́mir men ólim», «Shyǵys ulyna hat», «Zaman bizdiki», «Jaýyzdyq pen mahabbat» atty shyǵarmalary qan maıdannyń ortasynda júrgen jaýyngerlerge myqty rýh bergen, olardyń jigerin janyp, namysyn oıatqan.