Búgin Keńes Odaǵynyń batyry Baýyrjan Momyshulynyń týǵanyna 110 jyl tolyp otyr. Ataýly kúnge oraı, Senat spıkeri Máýlen Áshimbaev feısbýktegi paraqshasyna jazba qaldyrdy, dep habarlaıdy Egemen.kz
«Báýkeńniń esimi halqymyz úshin qashanda batyrlyqtyń, qaısarlyqtyń jáne erjúrektiktiń sımvoly bolyp sanalady. Onyń soǵys jyldaryndaǵy erligi men ataq-dańqy birqatar elderge tarady. Sol kezde batyr atamyz daryndy qolbasshy, áskerı strateg, sheber uıymdastyrýshy retinde moıyndaldy.
Baýyrjan Momyshulynyń soǵystan keıin áskerı-ǵylymı qyzmetpen jáne ádebıetpen aınalysqany barshamyzǵa belgili. Onyń qalamynan maıdan dalasyn shynaıy sýrettegen kesekti shyǵarmalar týdy. Sol dúnıeler qazaq ádebıetindegi áskerı taqyryptyń negizin qalaýǵa úlken úles bolyp qosyldy.
Báýkeń – batyrlyǵymen qosa danalyǵymen de daralanǵan tulǵa. Ol sońyna urpaqqa úlgi bolar ónegeli oılar men naqyl sózder qaldyrdy. Qazirgi tańda Baýyrjan Momyshulynyń «Otan úshin otqa tús – kúımeısiń», «Tártipke baǵynǵan qul bolmaıdy» degen qanatty sózderin kúlli qazaq biledi desek, qatelese qoımaspyz. Batyrdyń osyndaı ósıetteri árdaıym jas býyndy minezdi, jigerli jáne otanshyl etip tárbıeleýdiń ózegi bolyp qala beretini sózsiz.
Shyn máninde, qazaq dalasy – batyrlar ınstıtýty qalyptasqan jer. Biz – asqaq rýh pen ór namysty tý etken sol babalardyń urpaǵymyz. Sondyqtan bolar, Baýyrjan Momyshulyna degen halyqtyń qurmet-qoshemeti eshqashan tómendegen emes. Qazaqta Baýyrjan esimdi azamattardyń kóp bolýy sonyń bir dáleli. Mundaı úrdisti ult batyrlaryn umytpaýdyń jáne ulyqtaýdyń ónegeli dástúri deýge ábden bolady.
Keshe osy mereıtoıǵa oraı «Egemen Qazaqstan» gazetinde Halyq Qaharmany, taǵy bir batyr aǵamyz Baqytjan Ertaev pen ǵalym Bolat Saılannyń «Qaharmandyq ónegesi» atty maqalasy jaryq kórdi. Bul eńbekte Baýyrjan Momyshulynyń erlikke toly ómir joly dáleldi derektermen kórsetilgen eken. Bas basylymnyń búgingi nómirine de «Baýyrjantanýdyń tunyǵy men tuńǵıyǵy» atty kólemdi suhbat jarııalanǵanyn atap ótken jón.
Osyndaı mazmundy dúnıelerdi keńinen dáripteý arqyly uly tulǵalarymyzdy odan ári tanı túsemiz. Biz ultymyzdyń aıbyny men aıbaryn asqaqtatqan qaharmannyń rýhyna taǵzym etip, esimin el jadynda máńgi saqtaýymyz kerek. Bul – búgingi býynnyń da, bolashaq urpaqtyń da perzenttik boryshy.
Endeshe, Keńestik kezeńniń ózinde tegin «Momyshuly» dep jazdyryp, Otandy súıýdiń ozyq úlgisin kórsetip ketken batyr amanatyna adal bolaıyq», delingen jazbada.