Mańǵystaý oblysyna saparmen kelgen Densaýlyq saqtaý mınıstri Salıdat Qaıyrbekova aımaqtyń densaýlyq saqtaý salasynyń jaı-kúıimen, memlekettik baǵdarlamalardyń júzege asyrylý barysymen tanysty.
Mańǵystaý oblysyna saparmen kelgen Densaýlyq saqtaý mınıstri Salıdat Qaıyrbekova aımaqtyń densaýlyq saqtaý salasynyń jaı-kúıimen, memlekettik baǵdarlamalardyń júzege asyrylý barysymen tanysty.
Jańaózen qalasynyń Teńge aýylynda ótken jyly iske qosylǵan dárigerlik ambýlatorııada bolyp, densaýlyq saqtaý uıymdarynyń halyqqa qoljetimdi jáne sapaly dárigerlik qyzmet kórsetý jónindegi jumystarymen tanysty. Emdelýshilermen júzdesken mınıstr dárigerlerdiń biliktiligin arttyrý úshin kóshpeli semınarlar ótkizý jáne kúndizgi stasıonarlardyń, egý kabınetteriniń jumysyn jaqsartý qajettigine mán berdi. Sondaı-aq, ol «Rahat» shaǵyn aýdanynda ornalasqan aýysymyna 250 adam qabyldaıtyn jańadan salynyp jatqan emhanada boldy. Bul emhananyń qurylysyna 598 mln. teńge bólingen, onyń 160 mln. teńgesi zamanaýı qural-jabdyqtarmen qamtamasyz etýge jumsalmaq.
S.Qaıyrbekova Jańaózen qalasynda jańadan boı kótergen 100 tósektik perzenthana qurylysymen tanysty. Buǵan deıin túrli sebeptermen kesheýildep, jyrǵa aınalǵan perzenthana qurylysy 2014 jyldyń alǵashqy aıy bastalysymen paıdalanýǵa beriledi dep kútilýde. Jańa perzenthananyń kommýnaldyq shyǵyndaryn óteý úshin mınıstr nysannyń 1 qabatyn jalǵa berýge bolatynyn aıtty.
Jańaózen qalasynyń medısına qyzmetkerlerimen kezdesken mınıstr Elbasynyń Qazaqstan halqyna Joldaýynda densaýlyq saqtaý uıymdarynyń jańartylýyna, aýrýhanalarǵa jóndeý jumystaryn júrgizýge, olardyń zamanaýı quraldarmen jabdyqtalýyna, bilikti mamandar daıarlaýǵa erekshe mán berilip otyrǵandyǵyn aıta kelip, alǵa qoıǵan mindetterdi oryndaýdy tapsyrdy.
Munaıly aýdanynda, Mańǵystaý oblystyq aýrýhanasynyń qurylysy salynyp jatqan «G» blogynda boldy. Medısına qyzmetkerlerimen kezdesken mınıstr 2013 jyldyń 9 aıynyń qorytyndysy boıynsha Densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasynyń oryndalý barysyna toqtalyp, óńirde týberkýlez, onkologııalyq aýrýlardan ólim-jitimniń azaımaı otyrǵandyǵyn atap ótti. Kadr máselesin sheshý qajettigin, sondaı-aq, mamandardyń biliktiligin arttyrý maqsatynda Respýblıkalyq ǵylymı ortalyq mamandaryn shaqyrtyp kóshpeli semınarlar uıymdastyrýdyń tıimdiligin aıtty.
Mańǵystaýdyń densaýlyq saqtaý salasyndaǵy basty qajettiliktiń biri – bilikti maman. Joǵarydan baıqaǵanymyzdaı, muny mınıstr de aıtty. Elge mınıstrlerdiń kelip-ketýi emes, sońynan nátıjeli is qalǵany kerek. Sondyqtan, sapardyń sátti bolýy – mınıstr tarapynan berilgen tapsyrmalar men aıtylǵan usynystardyń jemisti bolýymen ólshenbek.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.