QR UQK Shekara qyzmetiniń akademııasy Almaty qalasyndaǵy №1 balalar úıiniń tárbıelenýshilerine arnap ashyq esik kúnin ótkizdi.
QR UQK Shekara qyzmetiniń akademııasy Almaty qalasyndaǵy №1 balalar úıiniń tárbıelenýshilerine arnap ashyq esik kúnin ótkizdi.
Akademııanyń tárbıe jáne áleýmettik-quqyqtyq jumystar jónindegi basqarmasy áıelder keńesimen birlese otyryp, Mádenıet úıinde elimizdiń Prezıdenti týraly «Mır Nazarbaeva» derekti fılminiń kórsetilimin, sondaı-aq konsert jáne baıqaýlar uıymdastyrdy. Balalar úıiniń tárbıelenýshileri aldynda akademııanyń tárbıe jáne áleýmettik-quqyqtyq jumystar jónindegi basqarmasynyń bastyǵy, polkovnık Serik Beısekeev quttyqtaý sóz sóıledi. QR UQK Shekara qyzmeti akademııasynyń qurylýy men qalyptasýy týraly, bilim ordasynyń qabyrǵasynan túlep ushqan túlekterdiń keń-baıtaq Otanymyzdyń alǵy shepterin qorǵap júrgendigin tilge tıek etti.
Áserli fılmnen keıin kýrsanttardyń uıymdastyrýymen konsert qoıyldy. Konsert barysynda tek patrıottyq taqyryptaǵy ánder aıtylyp, bı bılenip qana qoımaı, ártúrli dýman-qoıylymdar kórsetilip, oǵan balalardyń ózderi de bar kúshterimen, albyrt kóńilderimen belsendilikpen qatysyp, sahnada óner kórsetip, kýrsanttardy barynsha qoldap otyrdy.
Kúrdeli matematıkalyq fıgýralardy jınap, shym-shytyryq logıkalyq esepterdi sheshýdiń kezegi kelgende sahnaǵa eresek tárbıelenýshiler shyǵyp, bilim, bilikterin kórsetti. Konserttiń sońynda kýrsanttar balalarǵa ózderi daıyndaǵan jańa jyldyq syılyqtaryn tabystady. Olardyń qýanyshynda shek bolmady.
Osylaısha óte shyqqan ashyq esik kúniniń sońynda balalar úıiniń dırektory Ǵaına Ysmaǵulova sóz alyp, tárbıelenýshilerdiń osylaısha ózderin Otanymyzdyń bir bólshegi retinde sezine bilýi, eń bastysy olardy jaqsy kóretinderdiń bar ekendigin bilýi baqyt ekendigin basa aıtty. Akademııanyń tárbıe jáne áleýmettik-quqyqtyq jumystar jónindegi basqarmasynyń bastyǵy, polkovnık Serik Beısekeev óz kezeginde mundaı kezdesýlerdiń aldaǵy kezde de dástúrge aınalatyndyǵyn, shekarashylar daıyndaıtyn oqý ornynyń esigi qashanda balalar úshin ashyq ekendigin atap ótti.
Is-shara sońy izgi tilekterge ulasty.
«Egemen-aqparat».