Meıirimdilik estafetasy máresine jetti

Aksııa uıymdastyrýshylary jalǵyz basty zeınetkerler men ardagerlerge, kóp balaly jáne muqtaj otbasylarǵa, son­daı-aq ómirde qıyn jaǵdaıǵa tap bolǵan adamdarǵa qoldaý bil­dirip, kómek kórsetti. Atap aıtqanda, estafetaǵa áıelder isi jáne otbasylyq-demografııalyq saıasat jónindegi komıssııa qo­syl­dy. Onyń ókilderi «Ana úıi» qoǵamdyq qorynyń analar úıine bardy. Kezdesý barysynda birqatar másele sheshildi. ÚEU mamandary analarǵa quqyqtyq jáne psıhologııalyq máseleler boıynsha keńes beredi. Sondaı-aq ortalyqtyń qamqorlyǵyndaǵy jandarǵa kásip pen is júrgizýdi úıretedi. Kezdesý barysynda qor ujymyna alǵys hattar men syı­lyqtar tabys etildi.

Nur-Sultan qalasy ákimdiginiń málimetinshe, «Astana jastary» jastar resýrstyq ortalyǵynyń eriktileri de qaıyrymdylyq jo­ba­syna belsene qatysty. 500-ge jýyq erikti jalǵyzbasty ardagerler men zeınetkerlerge aýlasynan qar shyǵaryp, otyn jarýǵa kómektesti. Kómekke muq­taj jáne kóp balaly 100 otbasy, múm­kindigi shekteýli adamdar, zeı­netkerler, ardagerler kómek aldy. Ár sebetke shamamen 30 kılo azyq-túlik salynǵan. Onyń ishinde eń qajetti ónimder – dándi-daqyldar, makaron, kúnbaǵys maıy jáne shaı bar. Sondaı-aq aksııa aıasynda jastar qysta kommýnaldyq qyzmetkerleri men qala turǵyndaryna elorda kóshelerinde ystyq shaı men baýyrsaqtar taratty.

«Jas sarbaz» balalar men jasóspirimder qozǵalysynyń tárbıelenýshileri de bul ıgi isti qoldady. Olar Qorǵanys mınıs­tr­liginiń áskerı dárigerlerine 30 azyq-túlik jıyntyǵyn berdi. Is-shara Qazaqstan Qarýly Kúsh­teriniń áskerı-patrıottyq orta­lyǵy men Magnum saýda orta­ly­ǵynyń qoldaýymen ótti. Sondaı-aq olar ardagerlerge de qolǵabys etti. Egde jastaǵy adam­darǵa azyq-túlik sebetteri jetkizilip, úı aýlasynan qar shyǵarýǵa kómek­testi.

«Jyl saıyn, qysta, qatty aıaz ben boranǵa qaramastan tynymsyz eńbek etetin adamdar bar. Olardyń osyndaı eńbe­gine alǵys retinde atalǵan aksııa uıymdastyrýdy sheshtik», dedi «Jas sarbaz» balalar-jasóspirimder áskerı-patrıottyq qozǵalysy RQB elordalyq fılıa­lynyń tóraǵasy Ashat Nalshybek.

Nur-Sultan qalasyndaǵy «Rý­hanı jańǵyrý» jobalyq keń­sesi ókilderi №90 mektep-gımnazııasyna 30 kitap syılady. Barlyq kitap «Rýhanı jańǵyrý» jobasy aıasynda týǵan ólkeniń tarıhı hám mádenı murasyn zertteý maqsatynda shyǵaryldy. Atap aıtqanda, «Qasıetti Qazaqstan» kitabynda kıeli jerler men eldiń mádenı murasy týraly baıandalady.

«Kitap – balany damytatyn negizgi quraldardyń biri. Sondyq­tan mektepke úsh tilde jazylǵan 30 kitap beremiz. Aldaǵy ýaqytta bul ıgi istiń jalǵasatynyna senim­­dimin», dep atap ótti «Rýha­nı jańǵyrý» jobalyq keńsesi dırek­torynyń orynbasary Jazıra Narımanqyzy.

«30 ıgi is» kórmesine qazaq­stan­­dyq ártister de qatysyp, kóp balaly otbasylardy aralap, olarǵa azyq-túlik taratty. Sondaı-aq Qazaqstan halqy Assam­bleıasynyń ókilderi «Para­sat» qaıyrymdylyq orta­ly­ǵymen birlese otyryp, muq­taj 50 otbasyna azyq-túlik sebet­te­rin jetkizdi.