Qaraǵandy oblysyndaǵy Shet aýdanynyń ortalyǵy Aqsý-Aıýly kentinde «Saǵat» stellasynyń ashylý saltanaty ótti. Ýaqyttyń ólshemine arnalǵan eskertkish Derbisaly batyr, Sáken Seıfýllın jáne Ábiken Hasenov atyndaǵy kóshelerdiń qıylysynan oryn tepti.
Osy oqıǵaǵa arnalǵan saltanatty rásimde aýdan ákimi Muhıt Muhtarov pen aýyl aqsaqaly Bekejan Hamzın stellanyń lentasyn kesti. Aýdandyq máslıhattyń hatshysy Báken Tóleýqulov, belgili jazýshy Kámel Júnistegi jáne aýyl aqsaqaly Isaq Jolǵutty qýanyshqa qutty bolsyn aıtyp, aýdan turǵyndaryna arnaǵan aq tilekterin aqtardy.
Bıiktigi 10 metr bolatyn alyp saǵat eskertkishi úsh kósheniń qıylysyna tegin ornatylmaǵan. Bul jerge aýdan turǵyndary kópten beri aınalma jol salý kerektigin aıtyp júrgen eken. Mine endi, túnde jaryq shashatyn «Saǵat» stellasy ýaqytty ǵana kórsetip qoımaı, el tilegine oraı salynǵan aınalma joldyń ortasynda úsh tarapqa jón siltep, jol-kólik qozǵalysynyń retti bolýyna da ıgi yqpalyn tıgizetin boldy.
«Sanaýly kúnderden keıin 2021 jyldy qarsy alamyz. Iаǵnı aldaǵy jyly Táýelsizdigimizdi alǵanymyzǵa 30 jyl tolady. «Saǵat» stellasy Ulyq merekeniń osynaý mereıtoıyna arnalyp ornatyldy. Táýelsizdik jyldaryndaǵy elimizdiń ótkeni men búgininiń jáne bolashaǵynyń arasyndaǵy berik dánekeri, ýaqyttyń ólshemi retindegi eskertkishtiń tárbıelik máni zor dep sanaımyn», deıdi Shet aýdanynyń ákimi M.Muhtarov.
Qaraǵandy oblysy,Shet aýdany