Nur-Sultan qalasy ákimdiginiń jáne «Jas Sarbaz» qozǵalysynyń ókilderi Aqkól qalasyndaǵy jetim jáne ata-anasynyń qamqorlyǵynsyz qalǵan balalarǵa arnalǵan №1 balalar úıiniń tárbıelenýshilerin, sonymen birge kóp balaly jáne áleýmettik jaǵdaıy tómen otbasylardaǵy 20 balany quttyqtap, syılyqtar tabystady, dep habarlaıdy Egemen.kz
«Jas Sarbaz» qozǵalysy Nur-Sultan qalalyq fılıalynyń tóraǵasy Ashat Nalshybek: «Kúni keshe erekshe qajettiligi bar balalar men 7 balasyn jalǵyz asyrap otyrǵan ananyń otbasyna kirip, merekelik syılyǵymyzdy tabystadyq. Bul ıgi is mindetti túrde óz jalǵasyn tabatynyna senemin», dep aıtyp ótti.
Balalar úıiniń 90 tárbıelenýshisine Aıaz atamen, syılyqtarmen jáne ertegi keıipkerlerimen mereke uıymdastyryldy.
«Jańa jyl – tańǵajaıyp mereke. Biz balalar úıinde tárbıelenip jatqan balalarǵa súıispenshiligimizdiń bir bóligin berip, jyldyń basty merekesin odan da qýanyshty jáne meıirimdi etýge sheshim qabyldadyq. Búgin biz «Jas Sarbaz» qozǵalysymen birge ulttyq áskerı-patrıottyq ortalyqtyń bastamasymen balalar úıine kelip, jańa jyldyq is-shara ótkizdik. Bizdiń basty maqsatymyz – balalardyń shynaıy kúlkilerin estý. Jańa jyldyq qyzyqtar jalǵasyn taba bersin», deıdi ákimniń bas ınspektory, áıelder isteri jáne otbasylyq-demografııalyq saıasat jónindegi komıssııa hatshysy Móldir Bólebaeva.
Aıta keteıik, «30 ıgi is» aksııasy aıasynda eriktiler erekshe jáne tolyq emes otbasylardyń balalaryn da quttyqtaıdy. 26 jeltoqsanǵa deıin Nur-Sultanda 400-den astam bala Aıaz ataǵa bara alady.
«Men balalardyń atynan Nur-Sultan ákimdigine jáne «Jas Sarbaz» ulttyq qozǵalysynyń ókilderine alǵys aıtamyn. Balalarǵa júrekterińizdiń bir bóligin syıladyńyzdar. Balalar úıine kóptegen qonaqtar keledi, olar kóptegen syılyqtar beredi. Biraq búgingi uıymdastyrǵan is-shara olarǵa úlken qýanysh syılady. Sizderge úlken jetistikter tileımiz», deıdi Aqkól qalalyq balalar úıi dırektorynyń oqý-tárbıe jumysy jónindegi orynbasary Botagóz Qazbekova.