Shymkentte jańa jyldyq shyrsha shamy jaǵyldy. Bıyl pandemııaǵa baılanysty merekelik sharaǵa sanaýly bala ata-anasymen qatysty, dep habarlaıdy Egemen.kz.
Ákimshilik-iskerlik alańyndaǵy jasandy shyrshanyń bıiktigi 25 metr. Ony bezendirýge jalpy uzyndyǵy 1200 metr qylqan japyraq, 110 dana jaryq shamdar men 760 dana altyn shar, 800 metr jyltyraq jumsalǵan. Saltanatty sharada qatysýshy ata-analar qoldaryndaǵy jaryq shashqan sharlaryn óz balalaryna usyndy. Bul astarly kórinis arqyly aıtylmaq bolǵan oıdy uıymdastyrýshylar: «Shar – Jer planetasynyń sımvoly, ol bizdiń ortaq úıimizdiń názik ásemdigin beıneleıdi. Ony aıalap, barynsha uqyptylyqpen qaraý – asa ózekti másele bolyp otyr. Osy ısharaly áreketi arqyly úlkender Jer-Anaǵa qamqorlyqpen qaraýdy óz balalaryna amanattaıdy», - dep túsindirdi. Saltanatty sharanyń sońynda qatysýshylar estrada juldyzdarymen birge Shymkent týraly jańajyldyq ándi shyrqady.Aıta keteıik, karantınge baılanysty bıylǵy jańa jyldyq shara Ońtústik telearnasynda tikeleı efır arqyly kórsetildi.