2020 jyldyń 26 jeltoqsanynda Almaty qalasy ákiminiń orynbasary Erjan Babaqumarov «Úmit úıine» baryp, qalalyq bilim, qoǵamdyq densaýlyq basqarmalary ókilderiniń qatysýymen qalalyq qamqorshylyq keńesiniń otyrysyn ótkizdi, dep habarlaıdy Egemen.kz.
Otyrys barysynda qıyn ómirlik jaǵdaıdaǵy jalǵyz basty analar men ákelerge kómek kórsetý múmkindikteri qarastyryldy. Tıisti basqarmalar men aýdan ákimdikterine jumysqa ornalasýǵa járdemdesý, onyń ishinde memlekettik jáne salalyq baǵdarlamalar aıasynda, sondaı-aq medısınalyq jáne bilim berý qyzmetterimen qamtý boıynsha sharalar qabyldaý tapsyryldy.
Búginde Úmit úıinde jańa týǵan balalardan bastap, 7 jasqa deıingi balalar ýaqytsha tárbıelenýde. Mekeme jumys istegeli munda 604 tárbıelenýshi oqytyldy. Fızıkalyq, psıhologııalyq jáne adamgershilik-rýhanı damýyn eskere otyryp, olardyń mektepke deıingi bilim jáne tárbıe alýyna jaǵdaı jasalǵan.