Uly Abaıdyń óleńderi júz jasqa taıap qalǵan keıýananyń ózine rýhanı azyq, kúsh-qýat beredi. «Abaı atamyzdyń oıly sózderi, ónegeli jyrlary oqyǵan saıyn jandy jadyrata túsedi», deıdi Balqash qalasynda turatyn 96 jastaǵy Rahıla Erjanova. Bir qyzyǵy, júzge qadam basqan qarııa hakimniń óleńderin kez kelgen jerinen úzip alyp, jatqa oqı beredi eken.
Rahıla Erjanova ájeı 1924 jyly Balqash kóliniń jaǵasyndaǵy balyqshylar aýyly Tasaralda dúnıege kelgen. Aýmaly-tókpeli zamanda bes-aq synyptyq bilim alypty. Turmys qurǵannan keıin kúıeýimen birge balyq aýlaý sharýashylyǵynda eńbek etken. Eki balany dúnıege ákelip, olarǵa ónegeli tárbıe beredi. Jumysynyń tyǵyzdyǵyna, oqýynyń azdyǵyna qaramastan bar kúshin balalarynyń bilim alýyna jumsap, olardyń boıyndaǵy ádebıetke degen súıispenshilikti oıata bilgen.
Keıýananyń qyzy Baıan Aıashbekova anasynyń Abaı shyǵarmalaryna erekshe qunt qoıatynyn maqtanyshpen aıtady.
– Ol zamanda oqı alatyn áıelder az bolǵan ǵoı. Kóbi tek qana úı sharýashylyǵymen aınalysty. Biraq meniń anam jurttan jasyrsa da, óz betimen oqýǵa tyrysyp, bilimin jetildirip otyrǵan. Qazaq aqyndarynyń shyǵarmalaryn, ásirese Abaıdy súıip oqıdy, – deıdi ol.
Búgingi kúnde Rahıla ájeıdiń 9 nemeresi men 16 shóberesi bar. Olardyń barlyǵy da ónerli, kóbi óleńge qumar, án salǵandy unatady. Al keıýananyń ózi kóz janarynyń kómeski tartqanyna qaramastan, Abaıdyń kitabyn qolynan tastamaı, úzbeı oqyp otyrady.
Qaraǵandy oblysy,
Balqash qalasy