Qazaqstandyq jeńil atletshi, Olımpıada chempıony Olga Shıshıgına sporttyq jeke zattaryn elordadaǵy Ulttyq mýzeıge tartý etti.
Olga Shıshıgınanyń syıǵa tartqan jeke zattary Ulttyq mýzeıdiń «Asyl mura» zalynan oryn aldy. Olardyń qatarynda tanymal sportshynyń 2000 jyly Sıdneı jazǵy olımpıadasynan estelik zattary, sondaı-aq basqa da halyqaralyq sporttyq jarystarda jeńip alǵan medaldary men nagradalary bar.
«Sporttaǵy jetistikterimniń bir bóligin mýzeıge tapsyratyn kez keldi dep oılaımyn. Medaldar men marapattar úıde ǵana saqtalyp turmaı, mýzeıde saqtalǵany jón shyǵar. Sebebi meniń jetistikterim – ol elimniń jetistigi. Osy oraıda endigi ýaqytta mýzeıge kelýshiler meniń sporttaǵy jeńip alǵan marapattarymdy óz kózderimen kóre alady. Bul zattar meniń ómirimniń bir bóligi desem de bolady. Munda Keńes Odaǵy zamanynan kúni keshege deıingi men qatysqan jarystardan estelikter bar», dedi Olga Shıshıgına.
Is-sharaǵa memleket jáne qoǵam qaıratkerleri, sondaı-aq sport jáne mádenıet salasynyń ókilderi qatysty.
Olımpıada chempıony Ulttyq mýzeıge barlyǵy 45 jeke zatyn syıǵa tartty. «Olga Shıshıgına biz úshin sporttaǵy jarqyn jeńistiń sımvoly. Jerlesimizdiń Sıdneı Olımpıadasyndaǵy jeńisi áli kúnge esimizde jáne ol sport tarıhynda máńgi qalady. Bul kisi otanymyzdyń patrıoty jáne sportpen qatar elimizdiń damýyna da óz úlesin qosyp keledi», deıdi Ulttyq mýzeıdiń dırektory Arystanbek Muhamedıuly.
Aıta ketsek, atalǵan is-shara «Ulttyq mýzeıge syıǵa tartý» jobasy aıasynda uıymdastyryldy. Ondaǵy maqsat – elimizge jáne álemge tanymal tulǵalarǵa tıesili qundy jáne estelik zattardy saqtap, ony keıingi urpaqqa jetkizý.