Nur Otan partııasynan depýtattyqqa kandıdattar Petropavl qalasynyń 20-shaǵyn aýdanynyń turǵyndaryn saılaýǵa belsendi qatysýǵa shaqyrdy.
Májilis depýtattyǵyna kandıdat Esjan Orazalın, oblystyq máslıhat depýtattyǵyna kandıdat Vladımır Býbenko jáne qalalyq máslıhat depýtattyǵyna kandıdat Anatolıı Kazanovskıı qala turǵyndaryna partııanyń sońǵy 5 jyldaǵy jumysynyń qorytyndylary týraly aıtyp, saılaýaldy baǵdarlamasyn tanystyrdy.
Esjan Orazalın otbasy ınstıtýtyn nyǵaıtý, olardyń materıaldyq turaqtylyǵyn qamtamasyz etý, turǵyn úı alý úshin múmkindikter jasaý boıynsha sharalar kesheni qoldanylatynyn atap ótti.
«Bizdiń oblysta shamamen 137,4 myń otbasy turady, onyń ishinde kóp balaly 3 243 otbasy. Nur Otanniń maqsaty – 2025 jylǵa qaraı oblys boıynsha bir turǵynǵa shaqqanda turǵyn úımen qamtamasyz etilý kórsetkishin 25,5 sharshy metr deńgeıine deıin jetkizý. Bul úshin biz óńirde 89 kóp páterli turǵyn úı salý mindetin qoıyp otyrmyz», dedi Májilis depýtattyǵyna kandıdat Esjan Orazalın.
«7-20-25» jáne «5-10-20» baǵdarlamalary boıynsha oblys turǵyndaryn kredıttik turǵyn úımen qamtamasyz etý, turǵyn úı qurylysyna jeke ınvestısııalardy tartý jáne memlekettik-jekemenshik áriptestigin yntalandyrý boıynsha jumys jalǵasady. Nátıjesinde, 16,7 myń soltústikqazaqstandyq otbasynyń turǵyn úı jaǵdaıy jaqsartylady.
О́z kezeginde, oblystyq máslıhat depýtattyǵyna kandıdat Vladımır Býbenko qala turǵyndaryna densaýlyq saqtaýdyń jańa nysany týraly egjeı-tegjeıli aıtyp berdi.
«Petropavlda 510 tósektik qazirgi zamanǵy jabdyqtarmen kóp salaly aýrýhana salynady. Onda jumys isteıtin dárigerler qajetti kýrstardan ótip jatyr. Endi Nur-Sultan, Almaty, Túmen, Novosibir, Omby qalalaryna barýdyń qajeti joq. Soltústikqazaqstandyqtar osynda bilikti medısınalyq kómek alyp, densaýlyq máselelerin sheshe alady», dep atap ótti Vladımır Býbenko.