Qyzylorda oblysyndaǵy Ádep jónindegi keńestiń sheshimimen 31 memlekettik qyzmetshi tártiptik jazaǵa tartylǵan, dep habarlaıdy Egemen.kz. Bul týraly QR Memlekettik qyzmet isteri agenttiginiń Qyzylorda oblysy boıynsha departamenti basshysynyń orynbasary Berikbol Baıhojaev brıfıng barysynda aıtty.
Osy jyldyń 11 aıynda Ádep jónindegi keńestiń 13 otyrysy ótkizilip, onda 67 másele qaralǵan. Kún tártibinde 42 tártiptik is talqyǵa túsip, 17 ret memlekettik organ basshylary men ádep jónindegi ýákilderdiń esebi tyńdalǵan.
«Keńestiń sheshimimen Ádep kodeksi talaptaryn buzǵany úshin 13 memlekettik qyzmetshi, memlekettik qyzmetke kir keltiretin tártiptik teris qylyqtarǵa jol bergeni úshin 18 memlekettik qyzmetshi tártiptik jazaǵa tartyldy. Olardyń arasynda eki 2 oblystyq basqarma basshysynyń orynbasary, 1 aýdan ákiminiń orynbasary, 3 aýdan ákimi apparatynyń basshysy, 1 aýdandyq máslıhat apparatynyń basshysy, 6 kent jáne aýyldyq okrýg ákimi, 1 aýdandyq basqarma basshysy, 4 derbes bólim basshysy, 13 ózge de laýazymdy tulǵalar bar», dedi Berikbol Baıhojaev.
Departament tarapynan memlekettik qyzmetshilerdiń kúndelikti qyzmetinde jáne halyqpen kezdesý barysynda ózin-ózi ustaýy men kópshilik aldynda sóıleý kezinde ádep normalarynyń saqtalýy boıynsha 100-den asa quqyqtyq oqytý men sheberlik sabaqtary ótkizilgen.
Brıfıngte Baıhojaev Ádep kodeksi talaptary buzýshylyqtaryn aldyn alý maqsatynda memlekettik organ basshylaryna karantın talaptaryn qatań saqtaýdy jáne Jańa jyl merekesine oraı korporatıvtik keshterden bas tartýdy usyndy.
Sonymen qatar spıker, mereke qarsańynda memlekettik qyzmetshilerdiń zańsyz syılyq alý-berý faktilerine jol bermeý kerek ekenin qatań eskertti.