Jańa jyl merekesine oraı Jambyl oblysynda 200 balaǵa Qazaqstan Respýblıkasy Prezıdentiniń syılyǵy tabystaldy, dep habarlaıdy Egemen.kz.
Olardyń qatarynda ata-anasynyń qaraýynsyz qalǵan, jetim, kópbalaly jáne az qamtylǵan otbasydan shyqqan, erekshe bilim berýdi qajet etetin 9-13 jas aralyǵyndaǵy balalar bar.
Jambyldyq balalarǵa Memleket basshysynyń atynan quttyqtaý hat, eki tildegi «Uly Abaı» ensıklopedııasy men «Qazaq ertegileri» jınaǵy, sondaı-aq, tátti syılyqtar jáne aqshalaı sertıfıkat berildi.
El Prezıdentiniń atynan kelgen syılyqqa Taraz qalasyndaǵy ómirlik qıyn jaǵdaıdaǵy balalardy qoldaý ortalyǵynyń tárbıelenýshileri de ıe boldy.
Sonymen qatar óńirdegi 100 balaǵa Jambyl oblysynyń ákimi atynan da syılyqtar tabystaldy. Bir aıta keterligi, elimizdegi karantın jaǵdaıyna baılanysty jáne elimizdiń Bilim jáne ǵylym mınıstrliginiń hatyna sáıkes, bıyl oblysta Qazaqstan Respýblıkasynyń Prezıdenti, oblys ákimi jáne qala, aýdan ákimderi atynan jańajyldyq shyrsha keshi uıymdastyrylmaıtyn boldy.