Tuńǵysh Prezıdent – Elbasy atyndaǵy Ulttyq qorǵanys ýnıversıtetiniń jalpy áskerı fakýltetine aty ańyzǵa aınalǵan qolbasshy Baýyrjan Momyshulynyń esimi berildi, dep habarlaıdy Egemen.kz.
Saltanatty ashylý rásimi Uly Otan soǵysyna qatysýshy, Keńes Odaǵynyń batyry, Halyq qaharmany Baýyrjan Momyshulynyń 110 jyldyǵyna oraılastyryldy.
Atalǵan is-sharaǵa basshylyq, professorlyq oqytýshy quram men ýnıversıtettiń tyńdaýshylary qatysty.
«Baýyrjan Momyshulynyń ómir joly men erlikteri árqashan barlyq ofıserge jáne jas urpaqqa úlgi bolary anyq. Batyrdyń esimi berilgen jalpy áskerı fakýltetiniń ashylýy bizdiń oqý ornyna fakýltet magıstranttaryn daıarlaýda zor úlesin qosady dep úmittenemin», - dep Ulttyq qorǵanys ýnıversıtetiniń bastyǵy general-leıtenant Sultan Qamaletdınov atap ótti.
Saltanatty jaǵdaıda qatysýshylar komandırdi qurmetpen eske alyp, onyń ómiri men erlikteri týraly qyzyqty faktilermen bólisti. О́skeleń urpaqty tárbıeleýde batyrdy úlgi etýdiń mańyzdylyǵyn atap ótti.
Osy kúni aty ańyzǵa aınalǵan Baýyrjan Momyshulyn eske alý qurmetine eskertkish burysh ashyldy.
«Jedel-taktıkalyq basqarý býynynyń joǵary bilikti ofıserlerin, bolashaq qolbasshylardy daıarlaıtyn jetekshi fakýltetterdiń biri Baýyrjan Momyshulynyń esimimen atalady», - dep tolyqtyrdy jedel óner jáne taktıka kafedrasynyń bastyǵy polkovnık Ernest Júsipov.