Qytaı bıligi Alibaba Group-qa qatysty monopolııaǵa qarsy tergeý prosedýrasyn bastady. Bul týraly Wall Street Journal habarlady.
Naryqty retteý jónindegi memlekettik basqarmasy keltirgen málimetke súıensek, Alibaba Group satýshylardy «ekeýdiń bireýin tańdaýǵa», ıaǵnı ózderimen ǵana jumys istep, básekelesterimen jumysty toqtatýǵa májbúrlegen.
«Zańǵa sáıkes, Alibaba Group-qa qatysty monopolıstik áreketterge kúdik boıynsha tergeý bastaldy», delingen memlekettik basqarmanyń naryqty retteý jaıly málimdemesinde.
Alibaba Group kompanııasy beısenbide habarlama alǵanyn jáne retteýshilerdiń tergeýine belsendilik tanytyp kómektesetinin rastady. Osydan keıin kompanııanyń Gonkong qor bırjasyndaǵy aksııalarynyń baǵasy 8,1 paıyzǵa tómendedi.
Biraz ýaqyt buryn Qytaı bıligi Alibaba kompanııasynyń quny 35 mlrd dollarlyq Ant Group jobasyn IPO-ǵa shyǵarýyna tyıym salǵan-dy. Bul qadam Alibaba basshylyǵyn da, ınvestorlardy da tańǵaldyrǵany anyq.
Beıjiń bıliginiń Ant Group-tyń IPO-ǵa shyǵýyna jol bermeýiniń basty sebebi bireý ǵana. Taıaýda Alibaba-nyń negizin qalaǵan Djek Ma Shanhaıdaǵy jıyndardyń birinde Qytaıdyń ınternet tehnologııa salasyndaǵy erejelerin synaǵan bolatyn. Wall Street Journal-dyń keltirgen málimetterine súıensek, osy oqıǵadan keıin Sı Szınpın quzyrly organdarǵa arnaıy tapsyrma berip, Alibaba-nyń máselesin maıshammen qaraýdy tapsyrǵan kórinedi.