Búgin oblys ákimi Gúlshara Ábdiqalyqova Qyzylorda qalasynda «Nurly jer» baǵdarlamasy aıasynda salynǵan 2 turǵyn úıdiń páter kiltin tabystaý jáne Shirkeıli kanaly ústinen salynǵan kópirdiń saltanatty ashylý rásimine qatysty .
Aldymen oblys ákimi jańa páter kiltin tabystap, turǵyndarǵa quttyqtaýyn jetkizdi.
- Barshańyzdy kele jatqan Jańa jyl merekesimen shyn júrekten quttyqtaımyn! О́zderińiz bilesizder, álemde oryn alǵan pandemııa turmys-tirshiligimizge kóptegen ózgerister ákeldi. Syndarly sátte aımaǵymyzda qurylys jumystary toqtamaı, qarqyndy júrgizildi. Jyl basynan beri qalada 580 páterdi quraıtyn 15 turǵyn úı paıdalanýǵa berildi. Jańa baspanalaryńyz tatýlyq pen berekeniń ordasy bolyp, qýanysh pen baqyt, qut pen yrys saltanat qursyn!, - dedi oblys ákimi.
Sharada turǵyndar atynan № 140 mekteptiń muǵalimi Galına Omarova aımaq basshysyna alǵysyn jetkizip, memleket jáne qoǵam qaıratkeri Bekmyrza Elamanov batasyn berdi.
Jańa 40 páterli eki turǵyn úıdiń qurylysy ótken jyly bastalǵan. Joba quny 961,4 mln teńge. Merdiger mekemeler - «Aman-Qurylys» jáne «Sát-Servıs» JShS.
Osydan keıin oblys ákimi Gúlshara Ábdiqalyqova Shirkeıli kanalynyń ústinen salynǵan kópirdiń saltanatty ashylý rásimine qatysyp, jańa nysannyń el ıgiligine qyzmet etetinine senim bildirdi.
- Búgin, mereke qarsańynda Syrdarııa ózeniniń sol jaǵalaýyn Shirkeıli arnasy arqyly halyqaralyq avtodálizben qosatyn avtomobıl kópiri paıdalanýǵa berilgeli otyr. Sáni men saltanaty jarasqan Sol jaǵalaýdaǵy bul kópir oblys turǵyndarynyń altyn ýaqytyn únemdep, barynsha qýantatyn mańyzdy nysan bolatyny sózsiz. Búgingi kópirdi paıdalanýǵa berý arqyly aımaqtyń áleýmettik-ekonomıkalyq damýyn oń tendensııa arttyratyn bolamyz, - dedi oblys ákimi.
Sondaı-aq, saltanatty sharada oblystyń jol salasy boıynsha assosıasııasynyń prezıdenti, "Qurmet" ordeniniń ıegeri О́mirbek Shámenov izgi nıetin jetkizdi.
Kópir uzyndyǵy - 81,8 metr. «Nurly Jol» memlekettik baǵdarlamasy aıasynda nysandy bas merdiger «Servıs NS» jaýapkershiligi shekteýli seriktestigi eki jyl ishinde aıaqtap shyqty.
Sonymen qatar oblys basshysyna bıyl júzege asyryla bastaǵan «Qyzylorda qalasy Syrdarııa ózeniniń sol jaǵalaýyndaǵy bas kóshe jolynyń «Batys Eýropa – Batys Qytaı» avtotrassasymen janasatyn jerinde kólik aıryǵyn salý» jobasy tanystyryldy.
Jobanyń quny 4 274,941 mln. teńgeni quraıdy. Bas merdiger "Bazis Construction" JShS. 2020 jylǵa respýblıkalyq bıýdjetten 300 mln. teńge bólingen. Qurylys 2022 jyly aıaqtalady dep josparlanýda. Joba boıynsha 2 dana estakada qarastyrylǵan. Bir estakadada 12 tireýden turady, ár tireýde 10 temirbetondy svaıdan ornalasqan. Qozǵalys jolaǵynyń eni – 7 metr, trotýar eni - 1,5 metr bolady dep kútilýde.