Palata jumysy qorytyndylandy

Onyń ishinde áleýmettik qorǵaý, densaýlyq saqtaý, bilim, shaǵyn jáne orta bıznesti qoldaý, ekologııalyq jaǵdaıdy jaqsartý negizgi baǵyttarǵa aınaldy. Nurlan Nyǵmatýlın qabyldanǵan barlyq zańdar halqymyzdy áleýmettik qoldaýǵa, elimizdi odan ári damytýǵa yqpal etetinin jetkizdi. 

Tutastaı alǵanda, osy shaqyrylym barysynda Parlament palatalarynyń 23 birlesken otyrysy, Májilistiń 1208 másele qaralǵan 186 jalpy otyrysy ótken.

Osy ýaqyt ishinde Palatanyń qaraýyna 487 zań jobasy túsip, onyń 432-si maquldanyp, Senatqa joldandy. Qazirgi tańda 391 zań jobasyna Memleket basshysy qol qoıdy. Taǵy bir erekshe aıta ketetin jaǵdaı, Májilis depýtattary osy shaqyrylymda 60 zań jobasyna ózderi bastamashy boldy.

Májilis Ekologııalyq kodeks, Ákimshilik rásimdik-prosestik kodeks jáne Halyq densaýlyǵy jáne densaýlyq saqtaý júıesi týraly, Salyq jáne bıýdjetke tólenetin basqa da mindetti tólemder týraly (Salyq kodeksi), sondaı-aq Kedendik retteý Jer qoınaýy jáne jer qoınaýyn paıdalaný týraly alty mańyzdy kodeksti qabyldady.

Májilis Tóraǵasy Nurlan Nyǵma­týlın shaqyrylym barysynda Nur Otan, «Aq jol», «Halyq kommýnısteri» par­tııalarynyń fraksııalary men Qazaqstan halqy Assambleıasynyń depýtattyq toby belsendi jumys istegenin jetkizdi.

«Erekshe aıtý kerek, bizdiń depýtattyq korpýs elde qalyptasqan jaǵdaı kezinde de, karantın kezinde de óz jumysyn bir kúnge toqtatqan joq. Qaıta, zamanǵa saı tehnologııalardy paıdalanyp, tıimdi jumys istedik», dedi N.Nyǵmatýlın.

Májilis qyzmeti barysynda halyq kótergen naqty máselelerdi sheshýge únemi kóńil bólip keledi. Osy bes jyl ishinde májilismender 1150 depýtattyq saýal joldap, turǵyndardan 23 700-ge jýyq hat kelip, olarǵa tıisti jaýaby qaıtarylǵan. Depýtattar óńirlerdi aralap, 17 myńnan astam kezdesý uıymdastyryp, 1 mıl­lıonnan astam halyqpen kezdesý ótkizdi.

Nurlan Nyǵmatýlın altynshy shaqyrylymdaǵy Parlament Májilisiniń jumysy ashyq ta nátıjeli bolǵanyn atap ótip, zań jobalaryn talqylaıtyn jumys toptarynyń quramyna parlamenttik emes partııalardyń, úkimettik emes uıymdar men qoǵamdyq birlestikterdiń ókilderi shaqyrylǵanyna nazar aýdardy. Májilistiń jalpy otyrystary, komıtetterdiń jıyndary bedeldi aqparattyq saıttarda, portaldarda onlaın túrde kórsetiletinine toqtaldy.

Jalpy otyrys barysynda depýtattar dıplomatııalyq qyzmet týraly zań jobasyn maquldady. Bul zań jobasyn qabyldaý dıplomatııalyq qyzmet organdary júıesiniń qyzmetin normatıvtik retteýdi jetildirýge, halyqaralyq uıym­darda jumys isteý úshin dıplomatııalyq qyzmet personalynyń yntasyn artty­rýǵa, osy organdardyń qarjylyq tárti­bin nyǵaıtýǵa jáne olqylyqtardy joıýǵa múmkindik beredi.

«Zańǵa kelesideı ózgerister men to­lyq­­tyrýlar engizý kózdelgen. Dıp­lo­ma­­tııalyq qyzmet ardagerleriniń áleý­­mettik qorǵalýyn jetildirý maq­satynda «Qazaqstan Respýblıkasy dıp­lo­ma­tııalyq qyzmetiniń ardageri» uǵy­myn bekitý usynylady. Bul sanatqa zeınet­kerlik jasqa tolǵan jáne keminde 25 jyl jalpy eńbek ótili bar, onyń ishinde Qa­zaq­stan Respýblıkasynyń dıp­lo­­matııa­lyq qyzmet organdarynda 15 jyl ju­mys istegen adamdar kiredi», dedi Syrt­qy ister mınıstri Muhtar Tileý­berdi.

Vedomstvo basshysynyń aıtýynsha, Tótenshe jáne ókiletti elshi, halyqaralyq uıymdar janyndaǵy Turaqty (ókiletti) ókil qyzmetin atqarǵan nemese Tótenshe jáne ókiletti elshi dıplomatııalyq dárejesi bar dıplomatııalyq qyzmet ardagerlerine aı saıyn aqshalaı tólem tólenedi. Oǵan qajetti shyǵyndardy Respýblıkalyq bıýdjet komıssııasy bıylǵy tamyzda qoldady.

«Álemdik saıasat pen ekonomıka salasynda irgeli jáne ǵylymı-qoldanbaly zertteýler júrgizý maqsatynda dı­plo­matııalyq qyzmet organdary júıesine ǵylymı mekemelerdi kirgizý usynylady. Bul Syrtqy ister mınıstrligine qaraıtyn Syrtqy saıası zertteýler ınstıtýtynyń mártebesin arttyryp, onyń qyzmetiniń negizgi baǵyttaryn bekitýge múmkindik beredi», dedi mınıstr.

Depýtattar birqatar ratı­fı­kasııalyq zań jobalaryn maquldady. Atap aıtqanda, olardyń qatarynda bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Serbııa Respýblıkasy arasyndaǵy erkin saýda týraly kelisim bar. Sonymen qatar jalpy otyrys­ta Eýrazııalyq ekonomıkalyq odaqqa qa­tysty 2014 jylǵy 29 mamyrdaǵy shartqa ózgerister engizý týraly hattama maquldandy. Bul týraly Saýda jáne ıntegrasııa mınıstri Baqyt Sultanov baıandama jasady.

«Eýrazııalyq ekonomıkalyq odaq týraly 2014 jylǵy 29 mamyrdaǵy shartqa ózgerister engizý týraly ratıfı­ka­sııalaýǵa usynylǵan hattama «Alǵashqy iri» Hattama bolyp sanalady. Ol boıynsha Eýrazııalyq ekonomıkalyq odaqqa múshe memleketter sarapshylarynyń birlesken jumysy tórt jyldan astam ýaqyt júrgizildi. Hattama Eýrazııalyq eko­nomıkalyq odaq týraly shartqa túze­týlerdiń úsh blogyn engizýdi kózdeıdi», dedi Baqyt Sultanov.

Onda birinshiden, básekelestik sala­syndaǵy ózgerister qamtylǵan. Eýra­zııalyq ekonomıkalyq odaqqa múshe memleketterdiń sharýashylyq júrgi­zýshi sýbektileri básekelestik shart­taryn buzǵan jaǵdaıda, Komıssııaǵa esker­týler men aldyn ala eskertýler berýge múmkindikter eskerilgen. Aldyn ala eskertý alǵannan keıin sharýa­shy­lyq júrgizýshi sýbektiler ereje buzý jaǵdaılaryn ózderi joıa alady, zar­dap shekken sýbektiler talaptar­dy buzǵandarmen kelise alady. Báseke­les­tikke qarsy tájirıbe jalǵasqan jaǵ­daıda, belgilengen aıyppuldar qoldany­latyn bolady.

Ekinshiden, Eýrazııalyq ekonomıkalyq komıssııaǵa energetıka, tehnıkalyq retteý, makroekonomıka, básekelestik jáne veterınarııa salalarynda qosymsha ókilettikter berý qarastyrylǵan. Bul ókilettikter Eýrazııalyq ekonomıkalyq odaq aıasynda qol qoıylǵan halyqaralyq sharttardyń, onyń ishinde Eýrazııalyq ekonomıkalyq odaq týraly sharttyń saldary bolyp sanalatynyn jáne Komıssııa qyzmetiniń ashyqtyǵyn qamtamasyz etýge baǵyttalǵanyn atap ótý qajet.

«Mysaly, tehnıkalyq retteý salasynda Komıssııa Keńesine múshe mem­le­ketterdi akkredıtteý jónindegi organ­dardyń ózara salystyrmaly baǵalaýdy júzege asyrý tártibin bekitý boıynsha ókilettikter beriledi. Odaqtyń qolda­nystaǵy quqyǵynda oǵan sáıkes múshe memleketterdi akkredıtteý jónindegi organdar ózara salystyrmaly baǵalaýdy júzege asyratyn norma bar ekenin atap ótken jón. Alaıda búgingi kúni salystyrmaly baǵalaý júrgizýdiń jeke tártibi bekitilmegen», dedi B. Sultanov.

Jalpy otyrysta palata Kaspıı teńizinde qyzmetti júzege asyrýǵa baılanysty, ónerkásiptik qaýipsizdik jáne ǵylym, sondaı-aq advokattyq qyzmet jáne zań kómegi máselelerine qatysty zań jobalaryn ekinshi oqylymda maquldap, qoǵamdyq keńesterdiń qyzmeti máseleleri boıynsha Senat engizgen túzetýlermen kelisti.

«О́tken jyly Qazaqstan Konvensııany ratıfıkasııalady. Oǵan qatysty jumys 20 jyldan asa ýaqyt boıy júrgizildi. Kaspıı mańyndaǵy barlyq elderdiń memlekettik organdarynyń, sarapshylary men iskerlik toptarynyń qatysýymen aýqymdy kelissózder jumysy iske asyryldy», dedi Kaspıı teńizinde qyzmetti júzege asyrýǵa baılanysty zań jobasy týraly baıandama jasaǵan depýtat Baqtyqoja Izmuhambetov.

Onyń aıtýynsha, zań jobasynda eni 15 teńiz mıli bolatyn aýmaqtyq sýlar belgilenedi, olardyń syrtqy shekaralary memlekettik mártebege ıe bolady. Aýmaqtyq sýlarǵa 10 mıldik balyq aýlaý aımaqtary qosylady, onda árbir memleket kásipshilikke arnalǵan aıryqsha quqyqtarǵa ıe. Balyq aýlaý kelisilgen ulttyq kvotalar negizinde júzege asyrylady.

«Balyq aýlaý aımaqtary sheginen tys ortaq sý keńistigi saqtalady. Mem­lekettik teńiz shekaralarynan tys ja­ǵalaýdaǵy elderdiń týlaryn kóterip júzetin kemeler úshin teńizde júzý erkin­digi qoldanylatyn bolady. Kaspıı mańy memleketteri balyq aýlaý aımaǵynda jáne ortaq sý keńistiginde sý bıologııalyq resýrstaryn qorǵaýdy birlesip júzege asyrady», dedi Májilis depýtaty.

Palata ınklıýzıvti bilim berý týraly zań jobasymen jumysty odan ári jalǵastyratyn bolyp, sot-saraptama qyzmeti máseleleri boıynsha zań jobasyn jumysqa aldy.

Otyrysty qorytyndylaǵan Májilis Tóraǵasy depýtattarǵa elimizdiń zańna­malyq bazasyn jetildirip, otandyq par­lamentarızmdi damytýǵa qosqan eleýli úlesteri úshin, sondaı-aq zań shyǵarý prosesine belsendi aralasqan barlyq memlekettik organdardyń, aza­mat­tyq qoǵamnyń, saraptamalyq qoǵam­das­tyqtyń ókilderine alǵysyn bildirdi.