...ánshisi
Dımash AQSh-tyń MTV arnasynan qazaq tilinde án salǵan tuńǵysh qazaqstandyq ánshi atanýy 2020 jyldyń eleýli jańalyǵy retinde tarıhta qaldy. Kári qurylyqty ónerimen tánti etken ánshiniń klıpin MTV USA arnasynyń resmı YouTube jelisi arqyly mıllıondaǵan ónersúıer qaýym erekshe yqylaspen qabyl aldy.
* * *
Án ónerinde jańa týǵan juldyz Qaraqat Bashanova 29 qarashada ótken balalar arasyndaǵy Junior Eurovision-2020 konkýrsynda 2-oryn ıelendi. Ol án baıqaýynda ákesine arnap «Forever» (Máńgilik) ánin oryndady. Ánshiniń baǵyn asyrǵan ádemi án desek, atalǵan ánniń avtory – kompozıtor, mýzykalyq prodıýser Hamıt Shańǵalıev. Onlaın konkýrsta Qaraqattyń sahnalyq kelbetin stılıst Anarbek Járdemov ázirledi. Al sahnalyq kórinisterdiń rejısseri – Andreı Hvan.
* * *
Pavlodar oblysyndaǵy Aqsýdyń týmasy, otandasymyz Imanbek tanymal amerıkalyq Gremmı syılyǵynyń úzdik remıks (Best Remixed Recording) atalymy boıynsha 5 úmitkerdiń biri retinde tańdaldy. Arnaıy mýzykalyq bilimi joq temirjolshy jigit jaıynda álemniń beldi basylymdary jarysa jazdy. Ataýly syılyqtyń jeńimpazdary qańtardyń 31-i kúni anyqtalǵansha Imanbekke tileýles jandardyń qatary kóp.
...dızaıneri
Abzal Isabekov – sán áleminde aıtýly jetistikke jetken qazaqstandyq. Sán ındýstrııasyna óziniń erekshe qoltańbasymen kelgen ol shetelderde týǵan elin tanytyp júr. Jas dızaıner áıgili Louis Vuitton, Celine syndy tanymal sán úılerinde jumys istegen. О́ziniń aıtýynsha, bıik jetistikterge jetýine anasy men ápkesiniń artqan senimi men kórsetken qoldaýy qanattandyrǵan.
...anımasııasy
«Muzbalaǵymyz» muzjarǵysh kemedeı sheteldik kıno óndirisiniń muhıtynda erkin júzip, otandyq mádenı aınalymymyzǵa olja salǵan jyl tabysy desek bolady. Aldynda alǵan aıtýly báıgelerin keshe taǵy eselep, Ystanbulda 100 fılmniń ishinen top jaryp, qara úzip shyqty. Qazaqtyń baıyrǵy ǵurpyn dáriptegen mýltfılmniń kórermenge rýhanı dárýmen syılary sózsiz. Uzaqtyǵy 65 mınýt quraıtyn mýltfılm 2D jáne 3D formatynda jasalǵan jáne ár sekýndynda 24-25 kadr sýret salynǵan. Kishkentaı búldirshinderdiń ǵana emes, úlkenderdiń de qyzyǵýshylyǵyn oıatqan kınokartına elimizde buryn-sońdy bolmaǵan qoshemetke ıe boldy. Bul jańǵyrý jolyndaǵy jańa bastama.
Kartına rejısserleri – Turdybek Maıdan men Tilek Tóleýǵazy.
...kartınasy
«Iаdrosyz bolashaq úshin» syılyǵynyń ıegeri, qos qolsyz qylqalam sheberi atanǵan Káripbek Kúıikovtiń «42500» týyndysy kópshiliktiń ystyq yqylasyna ıe boldy. Áleýmettik jeliniń áýenine tóńkerilgen halyq áýelde «memlekettik járdemaqy jetpegen» dep dúrse dolbarlaǵanymen, artynan sýret ıesi kartınanyń tarıhyn basqasha baıandady.
«Meniń aýzymmen tistep shelekpen sý tasyǵanym esimde. Anam tańerteń turyp, maǵan qaraıtyn. Sol kózqaras qatty janyma batatyn. Basqa da analar sekildi sıyrlardy shyǵar, attaqyrdy tazala, anany iste dep aıtqysy keledi. Biraq olaı aıta almaıdy. Amalsyz ózi isteýge týra keledi. Bul kartınada taýlardy, Egindibulaqtyń kórkem tabıǵatyn kórsetkim keldi. Bizdiń týra osyndaı sıyrymyz bar-tyn. Sıyrdy óriske aıdaıtynmyn. Sol kezdegi estelikter qolyma qylqalam alýǵa ıtermeledi. Bul – men úshin óte ystyq sýret», dedi K.Kúıikov.
Qasıetti óńir Qarqaralynyń kórkem tabıǵatyn kóz aldyna ákeletin ásem kartınaǵa qyzyǵýshylardyń qatary kóp bolǵan. Týyndysyn 42500 teńgege baǵalaǵan sýretshi eńbeginiń el arasyna úlken suranysqa ıe bolǵanyna dán rıza. «Meniń otbasym joq. Júrekten shyqqan týyndylarym – meniń balam sekildi. Men ómirden ótken soń artymnan qalatyn mura osylar», deıdi ómirge qushtar qylqalam sheberi.
...aıtysy
Qasirettiń bultyn túrgen kún raýandady. Ol – shuǵylasyn alty Alashtyń aspanynan tókken táýelsizdik tańy edi. Ony jyrǵa qosyp, oıyndaǵysyn ashyp, saıyn dalanyń saǵym júzgen kelbetinen syr aýlaǵan Alash balasynyń mańdaıyna jazylǵan baqyt. Sol máýeli merekeniń qarsańynda dástúrli túrde uıymdastyryp kele jatqan, bıyl «Abaı taǵylymy – Táýelsizdiktiń tiregi» atty taqyrypqa arqaý bolǵan respýblıkalyq aqyndar aıtysynda Syr súleıi Muhtar Nııazov úshinshi márte «Altyn dombyrany» qanjyǵasyna baılady. Osylaısha murajaıdan ári aspaǵan kıeli kádeni úıine alyp qaıtty.
Tiliniń tikeni bar, sóz qaǵystyrǵanda aqıqattyń aldaspanyn jarqyldatyp, tyńdarmannyń qulaq quryshyn qandyrǵan Muhtar Nııazov pen Bekarys Shoıbekov oıdym-oıdym oıy, tapqyr teńeýimen el kóńilin baýrap aldy. Ekeýara sóz qaǵystyrý arqyly búgingi qoǵamnyń kemshilikterin tilge tıek etip, ótkir ázilmen tyńdarmandy uıyta bilgen belgili shaıyrlar, abyzdyń ǵıbratty ǵumyryn da óleńmen órnekteı bildi. Shymyr shýmaq pen tapqyr ázildi oraılastyryp, qazaqtyń jany bolǵan aıtys kóshin órge súıredi.
...fotosy
El fotograftarynyń bıylǵy basty nysanasy karantındegi halyqtyń hal-ahýaly bolǵany aıtpasa da belgili. Áleýmettik jelide qarsha boraǵan vırýspen jan alysqan dárigerler men janyn shúberekke túıgen syrqattardyń syrttan túsirgen fotolary kóptiń kóńilin qulazytty. Bul qulazý «saqtyqta qorlyq joq» degen qaǵıdany eske qaıta salǵandaı boldy. Jahandyq indetpen janyn salyp kúresken medısına mamandaryna obektıvten qaraǵan fotograftardyń qaı-qaısysynyń eńbegin joǵary baǵalaýǵa bolatyndaı. Betperde taqqan halyqtyń úreıli kúıi, janardaǵy alańy, oqshaý ómir súrýge degen kózqarasy, qorqynyshy úılesim tapqan fotolardyń bárin ótken jyldyń úzdikterine jatqyzýǵa bolady. Halyqaralyq sarapshylardyń deni osy nusqany tańdaýda. Sebebi onlaın ómirge eti úırenbegen adamdardyń áreketi kameranyń aldynda qyzyq ta, qıly kórinedi.
Aıa О́MIRTAI,
Muhtar KÚMISBEK,
«Egemen Qazaqstan»