Búkilálemdik boks serııasynyń bıylǵy maýsymdaǵy úshinshi týrynda Astana Arlans ujymy Meksıkanyń Mexico Guerreros komandasyn qabyldap, 4:1 etip utty.
Búkilálemdik boks serııasynyń bıylǵy maýsymdaǵy úshinshi týrynda Astana Arlans ujymy Meksıkanyń Mexico Guerreros komandasyn qabyldap, 4:1 etip utty.
Kezdesý 6 jeltoqsan kúni ótti. Ony 49 kıloǵa deıingi boksshylar ashty. Shaıqasty óte qarqyndy ótkizgen Mardan Berikbaev meksıkalyq Hose Alberto Zaleta Reıesti erkin jeńdi. Budan keıin 56 kılodaǵy Meıirbolat Toıytov vızavıi Serhıo Chırıno Sanchesten basymdyǵyn tanytty. Ol bes raýndtyń qorytyndysy boıynsha bıik turdy. Matchtaǵy alań ıeleri úshin jalǵyz jeńilis osydan keıin tirkeldi. 64 kıloǵa deıingi Jánibek Ájibaı qonaq jigit Krıstıan Bıelmaǵa ese jiberip aldy.
Al sońǵy eki jekpe-jekte de qazaqstandyqtar qarsylastaryn tehnıkalyq nokaýtpen tize búktirdi. Eki aıqas ta tórtinshi raýndta aıaqtaldy. Aldymen 75 kıloǵa deıingi salmaqtaǵy ýkraın legıoneri Sergeı Derevıanchenko mehıkolyq Dıego de Hesýs Moreno Amadordy tas-talqan etse, sońynan 91 kılodaǵy Vasılıı Levıt sol úrdispen Krıstıan Demajdy ýaqytynan buryn joldan shyǵaryp tastady.
Sóıtip, «astanalyq arlandar» alǵashqy úsh kezdesýin de jeńispen aıaqtady. Olar kelesi matchty 13 jeltoqsan kúni Cuba Domadores komandasymen ótkizedi. Kýbalyqtar da osy kezge deıin jeńilip kórgen joq. Bostandyq aralynyń jigitteri tipti bir urysta da qarsylasyna des bermeı, barlyq matchtarynda 5:0 esebimen jeńiske jetip keledi.
Damır QOJAMQUL.