Keshe Ortalyq kommýnıkasııalar qyzmetinde bolǵan dástúrli brıfıngte 2017 jyly ótkiziletin EKSPO kórmesine qatysty qabyldanǵan zań jáne zańnamalyq aktilerge engizilgen túzetýler týraly áńgime boldy.
Keshe Ortalyq kommýnıkasııalar qyzmetinde bolǵan dástúrli brıfıngte 2017 jyly ótkiziletin EKSPO kórmesine qatysty qabyldanǵan zań jáne zańnamalyq aktilerge engizilgen túzetýler týraly áńgime boldy.
OKQ resmı ókili Altaı Ábıbýllaev «Astana EKSPO-2017» UK» AQ zańgerlik departamentiniń dırektory Maııa Egimbaevaǵa mıkrofon usynyp, elimiz eleńdep kútip otyrǵan aıtýly halyqaralyq sharalarǵa zańnamalyq turǵydan qandaı daıyndyqtar júrgizilgenin aıtyp berýdi surady.
Qysqa merzim ishinde moıynǵa alǵan mindetti abyroımen atqarýdyń negizi – ony aldymen zańnamalyq turǵydan bekemdep alý desek, osy rette jýrnalısterge sózin arnaǵan M.Egimbaeva EKSPO ótkizýge baılanysty birqatar zań aktilerine ózgerister engizý qajet bolǵanyn, aldymen EKSPO týraly zańmen segiz zańnamalyq aktige, onyń ishinde bıýdjettik jáne salyq kodeksterine túzetýler qarastyrylǵanyn tilge tıek etti. Onyń aıtýynsha, EKSPO-2017 kórmesin ótkizýge úmitker elderdiń arasyndaǵy konkýrstyń aıasynda qabyldanǵan mindettemelerdi oryndaý maqsatynda EKSPO kórmesin uıymdastyrýdy jáne ótkizýdi júzege asyratyn uıymdar úshin salyqtyq jeńildikter, kórme nysandaryna qatysty sáýlet, qala qurylysy jáne qurylys qyzmetin júzege asyrýdyń ońaılatylǵan tártibi, sondaı-aq, sheteldik standarttardy qoldaný múmkindigi sekildi jeńildikter kózdelip, oǵan qosa, Bıýdjettik kodekste «Astana EKSPO-2017» ulttyq kompanııasyn memlekettik bıýdjetten jedel maqsatty salym túrinde qarjylandyrý múmkindigi de eskerilipti.
Sóz joq, EKSPO nysandaryn salý qurylysshylardan qajyrly eńbekti qajet etedi. Al ol sol jolda merdiger qurylysshylar úshin «Arnaıy ekonomıkalyq aımaqtar týraly» Zańǵa ózgeristerdiń engizilýi, «Astana – jańa qala» AEA qatysýshysy mártebesin alýdyń jeńildetilgen tártibin engizýdiń tıgizer paıdasy mol bolmaq, degen zańger taǵy bir zańnyń tolyqtyrylǵanyn qaperge salyp ótti. Ol «Halyqtyń kóshi-qony týraly» Zań eken. Kórmege qatysý úshin elimizge kelgen jeke sanattaǵy adamdardy tirkeý jáne olardyń kelýiniń erekshe tártibin anyqtaýǵa múmkindik beretin qaǵıdalarymen tolyqtyrylǵan zańnyń kórmeniń tynysyn asha túsetinine senimin jetkizgen M.Egimbaeva álemdik aýqymdaǵy jańa energııa saqtaý tehnologııalaryn paıdalaný elementterin qoldanyp, EKSPO-2017 kórmesi aıasynda nysandardy salýda jáne jobalaýda tájirıbesi bar shetel mamandaryn jumysqa tartý tártibin jeńildetýdiń de josparlanǵanyn jetkizdi.
«Atalǵan qujatty qabyldaý EKSPO-2017 nysandary men ınfraqurylymdaryn ýaqtyly salýdyń qajetti zańdyq negizin qalyptastyrýǵa, sonymen qatar, ony ótkizýge baılanysty prosedýralyq jáne uıymdastyrýshylyq máselelerdi sheshýge múmkindik beredi jáne «EKSPO sııaqty aýqymdy sharany ótkizý elordamyzben birge, tutas Qazaqstan Respýblıkasynyń da ekonomıkalyq jáne ınfraqurylymdyq damýyn qosymsha yntalandyratyn bolady», dedi M.Egimbaeva. Sondaı aq, ol EKSPO-2017 kórmesiniń nysandaryn jobalaý jáne qurylysyn júzege asyratyn kompanııalardyń tizimi Úkimettiń bólek sheshimimen anyqtalatynyn jetkizdi.
Brıfıngke endi bir qatysýshy «Astana EKSPO-2017» UK» AQ qurylysy boıynsha basqarma tóraǵasynyń keńesshisi Qanaǵat Tilemisov: «Kórmeni ótkizý úshin bizge 10 myń qyzmet kórsetý mamanyn daıarlaý qajet, olardyń ishinde 3,5 myńǵa jýyǵy energııanyń jańǵyrtylmaly túrlerine jáne basqa da ozyq tehnologııalarǵa qatysy bar bir jaqty profıldegi joǵary bilimdi zııatkerler bolýy tıis», deı kele, búgingi tańda EKSPO-2017-ni daıyndaýǵa 10 shtabtyń jaýap beretinin aıtyp ótti. Sondaı-aq, ol jýrnalısterge EKSPO syndy aýqymdy kórmelerdi ótkizýde tájirıbesi bar sheteldik kadrlardy bul jumysqa keńinen tartý kózdelip otyrǵanyna da ekpin túsirdi.
Anar TО́LEÝHANQYZY,
«Egemen Qazaqstan».