О́nerge baýlıtyn onlaın dáris

«Ulaǵatty urpaq» jobasynyń artyqshylyǵy – kez kelgen ýaqyt­ta jáne kez kelgen jerde qol­je­tim­diligi. Munda siz Qazaq­stan­nyń qasıetti jerlerine vırtýaldy ekskýrsııalarmen birge ope­ra, balet, dramalyq ónerdiń úzdik úlgilerin, qyzyqty otandyq jáne sheteldik fılmder men mýltfılmderdi kóre alasyz jáne tańǵajaıyp mýzykalyq týyndylardy tyńdaı alasyz. Jas kórermenderge uzaqtyǵy 15 mınýttan aspaıtyn beınesabaqtar, onyń ishinde teorııalyq dárister men praktıkalyq tapsyrmalar usynylady. Bul – oqýshylar úshin keremet múmkindik. Toqsan saıyn jańa sabaqtar engiziledi. Mysaly, ekinshi toqsanda hal­qy­myz­dyń ulttyq aspaptary dombyra men qobyz úıretilse, kelesi toqsanda qolóner sabaǵynan qyshpen qumyra jasaý dáristeri qosylady.

Oqýshylarǵa mýzyka óneri ba­ǵy­ty boıynsha álemdik jáne qazaq mýzykasynyń damýy men qalyptasýy, alýan túrli aspap­tardyń shyǵý tarıhy, onda­ǵy ultttyq mýzyka sala­syn­yń órkendeýine úles qosqan ataq­ty sazgerler men talantty óner­paz­dar týraly Qazaqstannyń Eńbek Eri, Halyq ártisi A.Musahod­jae­va, Halyq ártisi G.Myr­za­bekova, Qazaqstannyń Eńbek sińirgen qaıratkeri T.Zabı­ro­va, S.Nurmoldaev syndy kásip­qoı mýzykanttardyń leksııalarynda aıtylady. Mýzyka ónerin zerttep, qyzyǵýshylyq tanytqan ár balaǵa bul jan-jaqty aqparat beredi.

Beıneleý óneri baǵytynda kes­kindeme, músin, grafıka túr­le­rin úırenýge múmkindik mol. Kórkem ónerdiń bul salasy oqýshylarǵa dúnıeni baıqaý, baqylaý, kórý, seziný nátıjesinde ásem beıne jasaýdy túsindiredi. Sonymen qatar balalarǵa akvarel, gýash boıaýlarymen sýret salý jáne ermeksazben mú­sin jasaý ádisteri úıretiledi. Oqý­shy beıneleý óneriniń tarıhymen, álemge áıgili qylqalam sheber­le­riniń tańǵajaıyp týyndylarymen, onyń ishinde qazaq beıneleý óneriniń negizin qalaǵan, Qazaqstannyń Halyq sýretshisi Ábilhan Qasteevten bastap qazirgi zamanaýı otandyq sýretshilerdiń jumystarymen tanysa alady. Beıne-dáristerde jer sharynyń túkpir-túkpirinde ornalasqan túrli mýzeılerge saıahattaıdy. Aıtylatyn kóne derekter men tyń aqparattar T.Júrgenov atyndaǵy Qazaq ulttyq óner akademııasy professory O.Batýrına, mýzykatanýshy I.Drýjınına jáne Á.Qasteev atyndaǵy óner murajaıy qyzmetkerleri G.Jubanova, A.Eleýova jáne G.Qaıyrbekova sııaqty kásibı mamandardyń leksııalarynda tolyǵyraq aıtylady.

Kıne­matografııa baǵy­tyn­­da­ álem kınosynyń­ tarıhy, qazaq kınematografııa­sy, «Qazaqfılm» kınos­týdııa­­sy­nyń alǵashqy fılmderi, kıno alańy deń­geıiniń túr­len­ýi Qazaq­stannyń kınosynshy­lar qa­ýymdastyǵynyń pre­zıden­ti G.Ábikeeva, Qazaqstannyń Eńbek sińirgen qaıratkerleri A.Mae­mı­rov, A.Bermuhambetova, B.Aıtjanov, Á.Ahmetov, A.Nóger­bek, A.О́tepbergen syndy kıno­maman­dardyń leksııalarynda qamtylady. Eski kınotaspalar men jańa beınematerıaldar, anımasııalyq mýltfılmder oqýshylar nazaryna usynylady.

Teatr óneri baǵyty boıynsha oqýshylar teatr, rejıssýra, dramatýrgııa, spektakl, ssenograf-sýretshiler, sonymen qatar qazaq teatrynyń qalyptasýy tarıhyna qanyǵyp, teatr salasynyń damýyna eleýli úles qosqan tulǵalardyń shyǵarmashylyǵy men akterlik sheberliginen maǵlumat alady. Teatr áleminiń sıqyrǵa toly mekenine sapar shegedi. Jańa termınder men qyzyqty aqparattar Qazaqstannyń Eńbek sińirgen qaırat­kerleri Á.Rahımov, A.Káki­shova, B.Ábdilmanov, Máde­nıet qaıratkeri M.Jakenova jáne basqa da tanymal óner adam­da­ry­nyń leksııalarynda aıtylady.

Bul jobanyń sátti júzege asýyna elimizdiń mańdaıaldy mádenıet oshaqtarynyń bári bel­sen­di atsalysyp kele jatyr. «Ula­ǵatty urpaq» onlaın-oqytý por­ta­lynyń aýdıtorııasy kún sanap kóbeıip keledi. Tek 4 qazannan bastap ­1 jeltoqsanǵa deıin portal­da­ǵy beınedáristerdiń jalpy qaralymy 1 mln 300 myńnan asyp ketken. Al búginge deıin onlaın-oqytý baǵdarlamasyna 10 myńǵa jýyq mektep oqýshylary tirkelgen.

Osyndaı jobalardyń negi­zin­de oqýshylar ǵasyrlar boıy jınaqtalǵan, ýaqyt synynan ótip, saralanǵan álemdik ónerdiń baı qazynasyn, mol tájirı­be­sin boıyna sińiredi. О́ıtkeni jastar álemdik aqyl-oıdyń máde­nıeti men dástúrli negizderin meń­ger­gen­de ǵana ozyq oılaý júıesi qalyptasatyny anyq.

Nargız TAMABEKQYZY,

M.Áýezov atyndaǵy Qazaq memlekettik akademııalyq drama teatry mýzeıiniń jetekshisi