Sharaına
Taıland premer-mınıstri Iınglak Chınavat keshe el parlamentiniń taratylatynyn jarııalady. Chınavattyń sózine qaraǵanda, jańa parlament saılaýy araǵa kóp ýaqyt salmaı, tezirek ótkizilýi qajet.
Sharaına
Taıland premer-mınıstri Iınglak Chınavat keshe el parlamentiniń taratylatynyn jarııalady. Chınavattyń sózine qaraǵanda, jańa parlament saılaýy araǵa kóp ýaqyt salmaı, tezirek ótkizilýi qajet.
«Qalyń kópshilik ókilderi úkimetke qarsy bolyp otyrǵan qazirgi kezde, – delingen premer-mınıstrdiń málimdemesinde, – eń jaqsysy – saılaý ótkizý jáne bılikti Taıland halqyna qaıtarý». Budan eki-úsh kún buryn Chınavat el úkimetine senim bildirý týraly referendým ótkizýdi usynǵan bolatyn. Saıasatker sonda, eger referendýmda halyq ózine senimsizdik bildiretin bolsa, otstavkaǵa ketý jóninde ýáde bergen edi. Oppozısııalyq kúshterdiń basty talabynyń biri – Chınavattyń ózin otstavkaǵa ketirý. Sońǵy túsken aqparattar boıynsha, dúısenbi kúni sherýshiler qatary 100 myń adamǵa jetken.
Adam óliminiń sońy tártipsizdikke ulasty
Sıngapýrde 400-ge jýyq ımmıgrant kóshege shyǵyp tártipsizdik jasady. Qaqtyǵystar ońtústik-azııalyqtardyń dúkenderi men meıramhanalary ornalasqan Shaǵyn Úndistan atalatyn kvartalda bolǵan. Bul elde mundaı áreketter 44 jyldan beri boı kórsetpegen eken.
Polısııanyń habarlaýynsha, tártipsizdikke qatysqan 27 adam ustalǵan, olardyń barlyǵy Ońtústik Azııa elderinen qonys aýdarǵandar kórinedi. Immıgranttar polısııa mashınalaryn aýdarǵan jáne órtegen. Qaqtyǵys saldarynan 18 adam zardap shegipti, olardyń kópshiligi quqyq qorǵaý organdarynyń qyzmetkerleri. Oqıǵanyń oryn alýyna Úndistannan kelgen 33 jastaǵy azamatty avtobýs qaǵyp, mert etýinen bolsa kerek. Búginde Sıngapýrde 1,3 mıllıondaı sheteldik jumysshy turady.
Olımpııa oıyndaryna barýdan bas tartty
Germanııa prezıdenti Ioahım Gaýk Sochıde ótetin qysqy Olımpııa oıyndaryna barýdan bas tartqan. Bul jóninde memleket basshysynyń baspasóz qyzmeti habarlady. Keıbir basylymdardyń jazýynsha, prezıdent Reseıde adam quqyǵy buzylatyndyǵyna qarsylyq belgisi retinde boıkot jarııalap otyr.
Germanııa prezıdentiniń ákimshiligi Reseı bıligine Olımpııa oıyndaryna barýdan bas tartý jóninde resmı habarlaý hat ta joldapty. Aqparattarǵa qaraǵanda, Gaýk óziniń bul qadamyn nemis sportshylarynan olardy qurmettemeý dep eseptemeýlerin ótinipti. Sonymen qatar, ol sportshylardy Olımpıadadan oralǵan soń, Mıýnhende merekelik kezdesý ótkizýge ýáde bergen.
Qysqa qaıyryp aıtqanda:
* AQSh-ta qarly boran men muzdy jaýyn saldarynan 2,5 myńnan astam avıareıs kestesi aýystyryldy. Aýa raıynyń qatal minez tanytýynan kóz jumǵan adamdar da bar.
* AQSh-ta alaıaqtyq jasady dep aıyptalǵan Reseıdiń on bir dıplomaty jaqyn kúnderi otbasylarymen otanyna oralady. Endi Reseı bıligi de buǵan «qarymta» qaıtarýy múmkin.
* Tehas qalasyndaǵy «Hıýston» áýejaıyna kelip qonǵan Ekspressjet avıakompanııasynyń ushaǵy bir jolaýshyny ushaq bortynda qaldyryp ketipti. Jolaýshy jol-jónekeı uıyqtap kelse kerek.
Barlyq laýazymynan aıyrylǵanyn rastady
Soltústik Koreıa bıligi el basshysy Kım Chen Ynnyń nemere aǵasy Chan Son Thektiń barlyq qyzmet laýazymynan aıyrylǵanyn rastady. Bul jóninde keshe «Reıter» agenttigi habarlady.
«Chan jáne onyń izbasarlary qylmystar jasaý arqyly bizdiń partııa men revolıýsııaǵa orasan zor zııan keltirdi», delingen soltústikkoreıalyq resmı aqparat agenttikteriniń habarlamasynda. Bul aqparat jeksenbi kúni KHDR Jumysshy partııasy saıası bıýrosynyń otyrysynan keıin taratylǵan. Chan men onyń izbasarlarynyń qandaı qylmystar jasaǵany jóninde naqty aqparat joq.
«Novostı» aqparat agenttigi taratyldy
Reseı prezıdenti Vladımır Pýtın Reseıdiń «Novostı» aqparat agenttigin taratý týraly jarlyqqa qol qoıdy. Qujat mátini keshe memleket basshysynyń resmı saıtynda jarııalandy.
Endi Reseıdiń «Novostı» AA-nyń bazasynda «Rossııa segodnıa» halyqaralyq aqparat agenttigi qurylatyn bolady. Jańa agenttiktiń bas dırektorlyǵyna «Reseı 1» telearnasynyń júrgizýshisi Dmıtrıı Kıselev taǵaıyndaldy. Jarlyqqa sáıkes atalǵan agenttiktiń bas dırektoryn el prezıdenti taǵaıyndaıdy jáne qyzmetten bosatady eken. Prezıdenttiń jarlyǵy boıynsha, sondaı-aq, «Golos Rossıı» radıo habarlaryn taratý kompanııasy da taratylyp, onyń múlki «Rossııa segodnıa» agenttigine beriletin kórinedi.
Lenın eskertkishin qulatyp tastady
Kıevte oppozısııalyq sherýge qatysýshylar Bessarabııa alańyndaǵy Vladımır Lenınniń eskertkishin qulatyp tastady. Bul aqparatty qalalyq mılısııanyń baspasóz qyzmeti rastady.
Quqyq qorǵaý organdarynyń aıtýynsha, aldymen betperde kıgen birneshe belgisiz adam eskertkishti aınala qorshaǵan. Odan soń olar faıerlerdi órtegen, odan keıin eskertkishti qulatqan. Mılısııa qyzmetkerleriniń sózine qaraǵanda, eskertkishti «Svoboda» ultshyl birlestiginiń músheleri qulatýy múmkin. Oqıǵaǵa qatysy bar degen kúdikpen qazirge eshkim ustalǵan joq. Al eskertkish 1946 jyldyń jeltoqsanynda ornatylǵan eken.
Internet materıaldary negizinde ázirlendi.