Tórt jyl buryn IýNESKO-nyń sheshimimen qazaqtyń urpaqtan urpaqqa jalǵasqan asyq oıyny «Adamzattyń materıaldyq emes muralary» tizimine engizilgen edi. Endi asyq oıynyna Atyraýdaǵy kompanııalarda jumys isteıtin sheteldikter qyzyǵýshylyq tanyta bastady.
Máselen, «Teńizshevroıl» JShS-nyń qyzmetkerleri túski úziliste asyq atady. Láńgi tebedi. Túski úzilisti dál osylaı kóńildi ótkizýdi Úkimet jáne jurtshylyqpen baılanys bóliminiń menedjeri Hamısh Pols usynǵan eken. Menedjerdiń bul usynysy áriptesteriniń tarapynan qoldaý taýypty.
– Qazaqstan – tarıhy baı el. Al qazaqtyń kóp ǵasyrlyq dástúri barshany qyzyqtyrady. Ásirese ulttyq oıyndarynyń jóni bólek. Sonyń ishinde asyq atý oıyny – dáldik pen eptilikke, sheberlikke úıretetin taptyrmaıtyn ádis. Láńgi tebýdiń de ózindik qyzyǵy bar. Mundaı oıyndar, birinshiden, adamnyń sergek júrýine oń áserin tıgizedi. Ekinshiden, áriptester arasyndaǵy korporatıvtik baılanysty nyǵaıta túsedi, – deıdi Hamısh Pols.
Qazir sheteldikter asyq atyp, láńgi tebý úshin túski úzilisti asyǵa kútedi. Atalǵan oıyndardy bir-birine úıretip júr. Tipti sheteldikter toǵyzqumalaq oınaýǵa da bet buryp otyr.
Atyraý oblysy