Qurlyqtyq hokkeı lıgasynyń (QHL) kezekti týr oıynyn Habarovskide «Amýr» klýbymen ótkizgen «Barys» býllıt serııasy boıynsha jeńiske jetip, jankúıerlerin qýantty.
«Barys» klýby úshin jańa jyldaǵy alǵashqy báseke tabysty ári nátıjeli aıaqtaldy. Segiz gol soǵylǵan oıynda qazaqstandyq komandanyń aıy ońynan týdy. Kezdesýdiń esebin alǵash qonaqtar ashty. 13-mınýtta Mettıý Frettın «Barysty» esepte alǵa shyǵarsa, birinshi kezeń sońyna deıin aıdyn ıeleri eki shaıba soǵyp, tarazy basyn ózderine aýdardy. 14-mınýtta Aleksandr Polýnın, 17-mınýtta Dmıtrıı Lýgın gol soqty. Ekinshi kezeńniń orta tusynda «Amýr» oıynshysy Mıhal Iordan mergendigimen kózge túsip, tablodaǵy kórsetkishti 3:1-ge jetkizdi. Arada birer mınýt ótkende Pavel Akolzın (33-mınýt) esep aıyrmasyn qysqartsa, Roman Starchenko (34-mınýt) tarazy basyn teńestirdi.
Úshinshi kezeńde komandalar taǵy da bir-bir shaıbamen almasty. Alǵash 52-mınýtta «Amýr» sapynan Sergeı Tereshenko komandasynyń tórtinshi golyn soqsa, ile-shala Nıkıta Mıhaılıs esepti 4:4-ke jetkizdi. Al qosymsha ýaqytta jaǵdaı ózgermegen soń, barlyq másele býllıt serııasynda sheshildi. Nátıjesinde, eki márte nátıjeli soqqy jasaǵan Roman Starchenko «Barysqa» jańa jyldaǵy alǵashqy jeńisti syılady. Eki komanda búgin taǵy da ózara baq synaıdy.