Almaty qalasynyń ákimi Baqytjan Saǵyntaevtyń tapsyrmasy boıynsha shaharda alǵashqy bolyp Jetisý aýdanynda «Shyńǵa órleý» áleýmettik klýby ashyldy. Jobanyń maqsaty - bastaýysh synyptarda oqıtyn kóp balaly jáne az qamtylǵan otbasylardan shyqqan balalardy damytý jáne oqytý. Bul týraly óńirlik kommýnıkasııalar qyzmeti alańynda ótken brıfıngte Jetisý aýdanynyń ákimi Gúlnar Kókebaeva aıtty, dep habarlaıdy Egemen.kz.
«Shyńǵa órleý» klýbynda beıneleý óneri úıirmesi, emdik dene shynyqtyrý, akterlik sheberlik úıirmesi, vokaldyq úıirme, doıby jáne shahmat, dombyra úıirmesi, bı úıirmesi, ózindik daıyndyq saǵattary sııaqty úıirmeler jumys isteıdi. Jyldyq qamtý 240 balany quraıdy.
«Jetisý aýdanynda 3 dene shynyqtyrý-saýyqtyrý keshenin ashý máselesi qala ákiminiń erekshe baqylaýynda tur. Atap aıtqanda, olar Qulager shaǵyn aýdanynda aýmaǵy 7,5 myń sh.m. jáne jobalyq qýaty bir aýysymda 150 adam qabyldaıtyn basseıni bar, Aınabulaq shaǵyn aýdanynda aýmaǵy 4,5 myń sh.m. jáne jobalyq qýaty bir aýysymda 100 adam, Kemel shaǵyn aýdanynda aýmaǵy 2,5 myń sh.m. jáne jobalyq qýaty bir aýysymda 94 adam qabyldaı alatyn basseınderi bolady. Qazirdiń ózinde ekeýi boıynsha qurylys bastalýda. Úsh dene shynyqtyrý-saýyqtyrý keshenin aǵymdaǵy jyldyń sońyna deıin ashý josparlanýda», - dep habarlady aýdan ákimi.
Balalar men jasóspirimder sportyn qoldaý úshin «Aınabulaq jekpe-jek ortalyǵy» ashyldy, onda 6 jastan 18 jasqa deıingi balalar tegin jattyǵa alady. Bıylǵy jyly sonymen birge, aýdannyń basqa 3 shaǵyn aýdandarynda: Kókjıek, Kókmaısa, Qulagerde osyǵan uqsas jekpe-jek ortalyqtaryn paıdalanýǵa berý josparlanyp otyr.
Halyqtyń áleýmettik osal toptarynan shyqqan balalardy sportqa tartý maqsatynda aýdanda 7 jastan 18 jasqa deıingi balalarǵa arnalǵan tegin fýtbol jáne voleıbol seksııalarynyń jobasy iske asyryldy. Tegin fýtbol men voleıboldan jyldyq qamtý 400 balany quraıdy.
2020 jyldyń tamyz aıynda «Rýhanı Jańǵyrý» baǵdarlamasy aıasynda júzege asyrylǵan «Dombyra mektebi» ashyldy, onyń maqsaty 6 jastan 18 jasqa deıingi balalardy jyl boıy tegin dombyra oınaýǵa úıretý bolyp tabylady. Qazirgi ýaqytta mektepte 200-ge jýyq bala oqıdy.
Balalardyń bos ýaqytyn ótkizetin nysandardy ashý boıynsha jumys jalǵasatyn bolady. Osy jyly Kókmaısa shaǵyn aýdanynda balalar shyǵarmashylyǵy ortalyǵyn ashý josparlanýda, onda horeografııa jáne mýzyka úıirmeleri, til úıretý kýrstary jáne zeınetkerlerge arnalǵan kabınet uıymdastyrylady.
«2020 jyly qala ákiminiń tapsyrmasy boıynsha 4-shi Aınabulaq shaǵyn aýdanynda № 24 kitaphanaǵa kúrdeli jóndeý júrgizildi. Jóndeýden keıin úı-jaı zamanaýı jıhazben jabdyqtalǵan, ózine-ózi qyzmet kórsetý buryshy ornatylǵan, ınternetke qol jetkizý aımaǵy uıymdastyrylǵan», deıdi Jetisý aýdanynyń ákimi.