Qurlyqtyq hokkeı lıgasynyń (QHL) kezekti týr oıynyn Habarovskide «Amýr» klýbymen ótkizgen «Barys» ekinshi kezdesýinde iri eseppen jeńilip qaldy.
Eki komanda arasyndaǵy alǵashqy básekede jerlesterimiz negizgi ýaqytta muz aıdyn ıelerimen 4:4 esebimen teń túsip, býllıt serııasynda qarsylastarynyń aldyn orap ketken bolatyn. Arada eki kún ótkennen keıingi qarymta kezdesýge «Amýr» oıynshylarynyń jeńilisten sabaq alyp, tyńǵylyqty daıyndyqpen kelgeni birden baıqaldy. Iаǵnı kezdesýdiń alǵashqy eki kezeńinde «Barys» qaqpasyna jaýapsyz tórt shaıba soqty. Birinshi 20 mınýtta Kırıll Rasskazov (10-mınýt) pen Gınek Zogorna (18-mınýt) kózge tússe, ekinshi kezeńde Gınek Zogorna (22-mınýt) dýbl avtory atandy. Al 33-mınýtta Aleksandr Gorshkov komandasynyń tórtinshi shaıbasyn soqty.
«Amýr» oıynshylary tórt shaıbamen shektelip qana qoımaı, úshinshi kezeńde taǵy bir gol saldy. «Barystyń» bos qalǵan qaqpasyn Vladımır Býtýzov dál kózdep, kezdesýdiń núktesin qoıdy. Eki kezeń boıy gol soǵa almaǵan qonaqtar tek úshinshi kezeńde bir golmen qarymta qaıtardy. Shaıba avtory – Darren Dıs. Osylaısha, jerlesterimiz qarymta matchta «Amýrdan» 5:1 esebimen ońbaı jeńildi.