Atyraýda patrýldik polısııa qyzmetkerleri memlekettik nómiri medısınalyq maskamen jasyrylǵan «Toıota Kamrı» avtokóligin júrgizgen jasóspirimdi ustady, dep habarlaıdy Egemen.kz
«Tekserý kezinde bul kólikti 16 jastaǵy jasóspirim júrgizgeni anyqtaldy. Jasóspirimge qatysty QR Ákimshilik quqyqbuzýshylyq týraly Kodeksiniń 590-babynyń 4-bólimimen ákimshilik hattama toltyryldy. Is qujattary sotqa joldanyp, avtokólik aıyp turaǵyna qoıyldy» dep habarlady oblystyq polısııa departamentiniń baspasóz qyzmeti.
Sondaı-aq jasóspirimge atalǵan Kodekstiń 612-babynyń 4-bólimimen ákimshilik hattama toltyrylyp, 29 170 teńge kóleminde aıyppul salyndy. Onyń ata-anasyna Ákimshilik quqyqbuzýshylyq týraly Kodeksiniń 442-babynyń 2-bólimimen ákimshilik hattama toltyrylyp, eskertý berildi.