Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Vladımır Volkov Almaty oblysynyń Qarasaı aýdanyna bardy, dep habarlaıdy Egemen.kz
Sapar barysynda ol aýdan máslıhatynyń jáne jergilikti atqarýshy organdardyń, sondaı-aq prokýratýra ókilderimen kezdesti. Sonymen birge Jibek joly aýyly mańynan ótetin joldy qaıta qalpyna keltirý jumystarymen tanysty.
Prokýratýra ókilderimen kezdesýde «Qazaqstan Respýblıkasynyń keıbir zańnamalyq aktilerine Qylmystyq proseste azamattardyń quqyqtaryn qorǵaýdy jáne sybaılas jemqorlyqqa qarsy is-qımyldy kúsheıtý máseleleri boıynsha ózgerister men tolyqtyrýlar engizý týraly» zańnyń jańa normalaryn talqylady.
Odan bólek, kámelet jasyna tolmaǵandarǵa qarsy qylmystyq áreketter úshin jaýapkershilikti kúsheıtý sharalary, sybaılas jemqorlyqqa qarsy zańnamalar jáne basqa da ózekti máseleler boıynsha sóz qozǵady.
Senator Vladımır Volkov qazaqstandyqtar tarapynan kóptegen ótinishter kelip túsetinin, ondaǵy máselelerdiń barlyǵy depýtattyq korpýstyń basty nazarynda ekenin jetkizdi.
«Maǵan Qarasaı aýdanynyń turǵyndarynan jer, jol-kólik ınfraqurylymyn damytý jáne basqa da máseleler boıynsha ótinishter kelip túsýde. Jolaýshylar poıyzy men avtobýs soqtyǵysqan burynǵy Shamalǵan stansasy mańynda jaıaý júrginshilerge arnalǵan kópir salý máselesi Senat qabyrǵasynda da talqylandy. Ol kópir ótken jyly ashylǵanyn jaqsy bilesizder. Qazir Jibek joly aýylynda aınalma joldy qalpyna keltirý jumystary júrgizilip jatyr. Bul jol temirjol ótkelinen ótetin kólikterdi aıtarlyqtaı azaıtady. Turǵyndardy alańdatqan barlyq másele nazardan tys qalmaıdy. Aldaǵy ýaqytta olar boıynsha jergilikti ákimdiktermen birlesip jumys isteımiz», dedi senator.
Senat depýtaty aýdandyq jolaýshylar kóligi jáne avtomobıl joldary bóliminiń ókilderimen kezdesip, sapaly jol qurylysy úshin qajetti tehnıkamen jáne qurylys materıaldarymen jabdyqtaý máselesin talqylady.