Elimizdiń ishki ister organdarynyń qurmetti ardageri, otstavkadaǵy polısııa podpolkovnıgi, tyl eńbekkeri Tashhodja Atashev saılaý ýchaskesi ashylysymen kelip, óz tańdaýyn jasady. Saıram aýdanynyń «Qurmetti azamaty», 95 jastaǵy Tashhodja qarııanyń qımyly shıraq.
«Memleketshil azamat retinde qaı zamanda da saılaýdan qalǵan emespin. Qyzmettesterime de, balalaryma da úlgi etetin ádetim osy, bul ózińdi azamat retinde qalyptastyrýdyń eń alǵashqy baspaldaǵy. Biz óz bolashaǵymyzǵa jaýapkershilikpen qaraýǵa mindettimiz», deıdi qarııa.
Túrkistan oblysynyń turǵyndary Parlament Májilisi men máslıhattar depýtattarynyń saılaýyna belsendi qatysyp, óz tańdaýlaryn jasady. О́ńirdegi 911 saılaý ýchaskesine 1 160 138 saılaýshy tirkelgen. Al oblys ortalyǵy – Túrkistan qalasynda 50 saılaý ýchaskesi jumys istedi. Onda qala turǵyndarymen qatar, qyzmet babynda júrgen azamattar jáne qalaǵa kelgen qonaqtar da daýys berdi. Saılaý ýchaskelerinde sanıtarlyq normalar barynsha muqııat saqtalǵan. Jaýapty mamandar árbir adamnyń dene qyzýyn ólshep, medısınalyq maska, qolǵaptyń bolýyn tekserdi. Sondaı-aq áleýmettik qashyqtyqtyń saqtalýy sát saıyn eskertilip otyrdy.
Túrkistan oblystyq aýmaqtyq saılaý komıssııasynyń málimetinshe, óńirde 17 aýmaqtyq saılaý komıssııasynyń 119 komıssııa múshesi men 911 ýchaskelik saılaý komıssııalarynyń 6193 komıssııa músheleri jumys istedi. Komıssııa músheleriniń barlyǵy kaskadtyq ádispen tolyq oqytylyp, testileýden ótkizilgen.
Túrkistan oblysy