Parlament Májilisi men máslıhattarynyń saılaýyna aqmolalyqtar belsendi qatysty dep atap ótti О́ńirlik kommýnıkasııalar qyzmetinde ótken brıfıngte Aqmola oblysy baıqaýshylary shtabynyń jetekshisi Erlan Zákirııanov.
Onyń aıtýynsha, aımaqtaǵy 722 saılaý ýchaskesinde tańnan keshki segizge deıin 378 206 adam daýys berip, óz tańdaýyn jasaǵan. Erlan Zákirııanov bul jolǵy saıası sharada oblys jastary asa belsendilik tanytqanyn atap ótti.
«Oblys aýmaǵynda Fransııa, Germanııa, Reseı jáne taǵy basqa elderden barlyǵy 17 halyqaralyq baıqaýshy tirkelip, óńirimizdiń Aqkól, Selınograd, Shortandy jáne Stepnogor men Kókshetaý qalalarynda saılaý barysyn baqylady. Saıası naýqanda eshqandaı zań buzýshylyq faktisi tirkelgen joq. Saılaý barysynda jastardyń belsendiligin atap ótsek deımin. Ásirese 30 jas pen 45 jas aralyǵyndaǵy azamattar asa belsendi boldy. Tańnan keshke deıin Aqmola oblysynyń saılaý ýchaskelerinde barlyǵy 378 206 adam daýys berdi», dedi oblystyq baıqaýshylar shtabynyń jetekshisi.
Jıyn barysynda «Qazaqstannyń Azamattyq alıansy» zańdy tulǵalar birlestigi Aqmola fılıalynyń tóraıymy Irına Terenteva da sóz sóılep, saılaý barysy týraly tarqatyp aıtyp berdi.
Aıta ketetin taǵy bir jaıt, Aqmola oblysynda 722 saılaý ýchaskesi jumys istedi. Onyń 697-si ashyq ýchaskeler. Oblystyń Azamattyq alıansynan jáne kásipodaqtardan 1005 baıqaýshy tirkelip, jergilikti saılaý ýchaskelerinde jumystaryn atqardy. Budan bólek saılaýǵa qatysyp jatqan bes partııanyń atynan 1723 ókil baıqaýshy retinde tirkeldi.