Atyraý oblystyq aýmaqtyq saılaý komıssııasynyń málimetinshe, saılaýdyń ótý úderisin baqylaý úshin TMD mıssııasy aıasynda Reseı Federasııasynyń Astrahan oblysynan bes, sondaı-aq Eýropadan eki baıqaýshy keldi.
Baıqaýshylar halyqaralyq akkredıtasııadan ótip, PTR-test tapsyrypty. Olardyń pikirinshe, saılaý joǵary deńgeıde uıymdastyryldy.
– Eń aldymen baıqaǵanym – saılaýda daýys berýshilerdiń qaýipsizdigine basa mán berilgeni. Barlyq ýchaske sanıtarlyq quraldarmen, onyń ishinde qorǵanysh ekrandary, sanıtarlyq kilemsheler, qol sanıtaızerleri, medısınalyq maskalarmen jabdyqtalypty. Zańbuzýshylyq baıqalǵan joq, – deıdi TMD mıssııasymen kelgen halyqaralyq baıqaýshy Vladımır Zolotokopov.
TMD mıssııasynyń taǵy bir ókili, baıqaýshy Sergeı Voronovtyń pikirinshe, saılaý Qazaqstan Respýblıkasynyń zańdaryna, halyqaralyq adam quqyqtaryn qorǵaý jónindegi talaptarǵa sáıkes ótti.
– Qazaqstanda halyqaralyq baıqaýshylardyń kedergisiz jumys isteýine barlyq jaǵdaı jasaldy. Saılaý ýchaskelerinde daýys berýshilerdiń belsendiligin baıqadym. Bul saılaý Qazaqstannyń saıası-ekonomıkalyq, áleýmettik-rýhanı damýynyń jańa belesi bolaryna senemin, – deıdi S.Voronov.