Qurlyqtyq hokkeı lıgasynyń (QHL) kezekti týrynda Nur-Sultannyń «Barysy» Qazannyń «Aq Bars» klýbyn qabyldady. Bul naǵyz shıeleniske toly báseke boldy, dep habarlaıdy Egemen.kz
Dál qazirgi kezde jerlesterimizge qaraǵanda tatarstandyq komandanyń qarqyny áldeqaıda kúshti. 44 kezdesýden keıin 68 upaı jıǵan olar Shyǵys konferensııasynda kósh bastap tur. Al keshegi kúnge deıin 44 match ótkizip, 41 upaıdy qorjynǵa salǵan «Barys» segizinshi oryndy qanaǵat tutýda. Soǵan qaramastan bizdiń jigitter áıgili qarsylasymen birazǵa deıin tiresti. Alǵashqy goldy 14-mınýtta qonaqtar saldy. Esesine Kırıll Panıýkov (16 jáne 22 mınýttarda) qatarynan eki márte nysanany dál kózdedi. Sol sátte jergilikti jankúıerlerdiń keýdesinde úmit oty jylt etti. Biraq kóńilimiz kóp uzamaı sý sepkendeı basyldy. Aıdyn ıelerine qaraǵanda áldeqaıda shıraq qımyldaǵan «Aq Bars» qalǵan ýaqytta qaqpamyzǵa taǵy úsh shaıba toǵytty. Nátıjesinde «Barys» 2:4 esebimen jeńilis tapty. «Barys» endi óziniń kelesi kezdesýin 14-qańtarda Nur-Sultanda Ýfanyń «Salavat Iýlaevyna» qarsy ótkizedi.